Publikuar më 02.09.2026 nga Shek

GREQI- Ministri grek i Mbrojtjes së Qytetarit, Michalis Chrysochoidis,  ka ngritur alarmin për përhapjen e rrjeteve të mashtrimeve telefonike që synojnë kryesisht qytetarët e moshuar.

Duke folur më 1 shtator në televizionin MEGA, Chrysochoidis tha se grupet kriminale po organizohen gjithnjë e më shumë dhe po marrin karakter ndërkombëtar.

“Çdo ditë organizohen gjithnjë e më shumë dhe marrin edhe karakter ndërkombëtar. Ka një call center në Shqipëri, për shembull, ka një call center në Maqedoninë e Veriut. Ka grupe specifike ndërkombëtare që merren me këto çështje”, deklaroi ministri grek.

Chrysochoidis i cilësoi mashtrimet telefonike si një “epidemi”, duke thënë se autorët kanë gjetur mënyra gjithnjë e më të lehta për t’u marrë qytetarëve në mënyrë të paligjshme paratë, pasuritë dhe sendet me vlerë.

Sipas tij, viktimat kryesore janë të moshuarit, të cilët mashtrohen përmes telefonatave të organizuara nga qendra operative.

“Janë ngritur qendra telefonike operative dhe e gjithë kjo po çon realisht në një epidemi. Mashtrojnë njerëzit, kryesisht të moshuarit”, tha ministri grek.

“Nuk është vetëm problem grek”

Ministri theksoi se fenomeni nuk kufizohet vetëm brenda Greqisë, por është kthyer në një problem europian. “Sepse nuk është vetëm grek, është pan-europian”, tha Chrysochoidis, duke shtuar se autoritetet greke kanë kryer një sërë operacionesh dhe arrestimesh, ndërsa shumë prej të dyshuarve ndodhen tashmë në burg. Megjithatë, sipas tij, pavarësisht goditjeve të policisë, rrjetet vazhdojnë të shfaqen dhe të zgjerohen.

Shqipëria dhe Maqedonia e Veriut në hartën e rrjeteve

Përmendja e Shqipërisë nga ministri grek vjen në një kohë kur autoritetet europiane po godasin gjithnjë e më shumë rrjete ndërkombëtare të mashtrimit që përdorin call center-a jashtë vendit për të kontaktuar viktimat në shtete të tjera.

Chrysochoidis e përdori Shqipërinë si një nga shembujt e vendeve ku, sipas tij, funksionojnë qendra telefonike të lidhura me këto skema kriminale, ndërsa përmendi edhe Maqedoninë e Veriut. Ai theksoi se bëhet fjalë për grupe ndërkombëtare, të cilat bashkëpunojnë përmes strukturave të shpërndara në vende të ndryshme.

“Do t’i arrestojmë të gjithë”

Ministri grek deklaroi se autoritetet nuk do të ndalen në luftën kundër këtyre grupeve.

“FBI-ja ka bërë arrestime shumë të mëdha, ashtu si edhe Policia e Atikës, por tani duhet të krijojmë struktura të përhershme për t’u përballur me problemin”, tha ai.

Më tej, Chrysochoidis dha një mesazh të prerë:

“Do t’i arrestojmë të gjithë.”

Sipas tij, ajo që nevojitet tashmë është krijimi i një strukture të përhershme dhe një politike të qëndrueshme operacionale për t’i dhënë fund fenomenit të mashtrimeve telefonike./ SHEKULLI