Aktorja dhe regjisorja amerikane Maggie Gyllenhaal ka ngritur shqetësimin për pabarazinë gjinore në industrinë e filmit, duke theksuar se gratë vazhdojnë të përballen me vështirësi më të mëdha për të siguruar financim për projektet e tyre.

Gyllenhaal, e cila kryeson jurinë e edicionit të 83-të të Festivalit të Filmit në Venecia, tha se përfaqësimi i ulët i grave në garën për Luanin e Artë është tregues i një problemi më të thellë në industrinë kinematografike.

Në garën kryesore të këtij viti janë vetëm dy filma të realizuar nga regjisore gra. Fillimisht, nga 20 filmat e përzgjedhur për garën kryesore, vetëm „Woman Unknown“ i regjisores danezo-egjiptiane May el-Toukhy ishte drejtuar nga një grua. Më pas, në konkurrencë u shtua edhe dokumentari „NAZA“, me regji nga Yuval Abraham dhe Rachel Szor, pjesë e ekipit krijues të filmit fitues të Oscarit, „No Other Land“.

“Është më e vështirë për gratë të sigurojnë financimin e filmave”, deklaroi Gyllenhaal, duke ngritur edhe një pyetje mbi mënyrën se si industria i vlerëson temat e trajtuara nga gratë.

“A është e mundur që gjërat për të cilat gratë duan të bëjnë filma, duke pasur një përvojë të ndryshme të jetës në këtë botë, të mos konsiderohen gjithmonë art i nivelit të lartë? Kush vendos se çfarë është e mirë? Kush vendos se çfarë ka vlerë?”, u shpreh ajo.

Gyllenhaal: Kinemaja është në mënyrë të pashmangshme politike

Gyllenhaal foli edhe për raportin mes kinemasë dhe politikës, në një edicion të Venecias ku disa prej filmave të përzgjedhur trajtojnë tema të ndjeshme, përfshirë konfliktin Izrael-Palestinë, luftën Rusi-Ukrainë, si dhe figura të fuqishme të botës së biznesit dhe teknologjisë.

Sipas saj, vetë natyra e kinemasë e bën atë të lidhur me politikën, veçanërisht përmes aftësisë për të krijuar empati dhe për t’i dhënë publikut mundësinë të shohë botën përmes përvojës së njerëzve të tjerë.

„Mendoj se nëse filmat janë vërtet një vështrim i sinqertë në përvojën e njerëzve të tjerë, atëherë ata janë në thelb dhe në mënyrë të pashmangshme politikë, përveç shumë gjërave të tjera që mund të jenë“, tha ajo.

Nga regjisore e vlerësuar te presidente e jurisë

Maggie Gyllenhaal ka një lidhje të veçantë me Festivalin e Venecias. Debutimi i saj si regjisore, „The Lost Daughter“, u shfaq në festival në vitin 2021 dhe i siguroi asaj çmimin për skenarin më të mirë.

Këtë vit ajo rikthehet në Venecia si presidente e jurisë, e cila përbëhet nga shtatë anëtarë. Në të janë edhe regjisorja tuniziane Kaouther Ben Hania, regjisori nga Hong Kongu Johnnie To, regjisorja afgane Shahrbanoo Sadat, kineasti francez Xavier Giannoli, kompozitori britanik Daniel Blumberg dhe studiuesi italian i filmit Francesco Casetti.

Gyllenhaal është gjithashtu pjesë e programit të festivalit me filmin e shkurtër „Flesh Impact“, i frymëzuar nga Marilyn Monroe, i cili shfaqet jashtë konkurrencës.

Deklaratat e saj rikthejnë në qendër të vëmendjes debatin mbi përfaqësimin e grave në industrinë e filmit dhe mbi mënyrën se si financohen, përzgjidhen dhe vlerësohen historitë e sjella në ekran.

Për Gyllenhaal, çështja nuk lidhet vetëm me mungesën e talenteve, por me një pabarazi më të thellë në mënyrën se si funksionon industria dhe se cilat histori konsiderohen të denja për t’u financuar dhe për t’u vlerësuar si art./KultPlus.com