“Ink”, filmi i ri i Danny Boyle, sjell në ekran vitet e hershme të Rupert Murdoch-ut në industrinë britanike të medias dhe ka hapur debat në Festivalin e Filmit në Venecia për mënyrën se si e portretizon figurën e debatueshme.

Në rolin e Murdoch-ut është Guy Pearce, i cili e paraqet atë si një rebel dhe outsider që sfidon elitën tradicionale britanike. Historia zhvillohet në vitin 1969, kur Murdoch mbërrin në Londër, blen gazetën The Sun dhe emëron Larry Lamb-in, të luajtur nga Jack O’Connell, për ta transformuar atë.

Dyshja synon të tërheqë lexuesit duke u fokusuar te temat që interesonin publikun e gjerë, nga sporti e televizioni te seksi dhe skandalet. Filmi e trajton këtë revolucion mediatik me ritëm të lartë, humor dhe një atmosferë hedoniste.

Por pikërisht portretizimi pozitiv i Murdoch-ut ka ndarë kritikët. Disa e kanë cilësuar filmin si tepër të butë dhe apolitik, duke argumentuar se ai e romantizon një figurë që më vonë do të ndërtonte një prej perandorive më të fuqishme mediatike në botë.

Danny Boyle, ndërkohë, ka mbrojtur këndvështrimin e filmit, duke thënë se Murdoch-u i vitit 1969 ishte “një frymë e freskët në një shoqëri britanike shumë të ngurtë”.

Në vend që të tregojë historinë e magnatit që bota njeh sot, Ink kthehet te momenti kur Murdoch-u ishte ende një i huaj që kërkonte të përmbyste rregullat e një sistemi të vjetër. Dhe pikërisht kjo zgjedhje e bën filmin një prej titujve më të diskutuar të Venecias./KultPlus.com