Qyteti i Rrëshenit do të përballet me kufizime në furnizimin me ujë të pijshëm, për shkak të rënies së prurjeve në burimin e Bargjanës. Situata është krijuar si pasojë e thatësirës së tejzgjatur, e cila ka ndikuar në burimet ujore dhe në sasinë e ujit të disponueshëm për furnizimin e qytetit.Njësia e Shërbimit Ujësjellës-Kanalizime Mirditë ka njoftuar se, duke nisur nga data 31 gusht 2026, furnizimi me ujë do të kufizohet gjatë intervalit 23:00 deri në 05:00. Ky orar është përcaktuar me qëllim që rezervat e ujit të menaxhohen në mënyrë sa më efikase dhe të sigurohet furnizimi për banorët gjatë orëve të ditës.Sipas ujësjellësit, kufizimi lidhet drejtpërdrejt me kushtet e vështira hidrike dhe me pamjaftueshmërinë e prurjeve në burimin që furnizon qytetin.
Në këto kushte, menaxhimi i rezervave shihet si i nevojshëm për të shmangur probleme më të mëdha në furnizimin me ujë.Banorëve të Rrëshenit u është kërkuar mirëkuptim dhe bashkëpunim gjatë kësaj periudhe, ndërsa apelohet edhe për përdorim sa më racional të ujit të pijshëm. Situata do të monitorohet në vijimësi nga strukturat përgjegjëse dhe, në rast të ndryshimit të prurjeve apo përmirësimit të situatës hidrike, skema e furnizimit do të rishikohet.Aktualisht kufizimi do të aplikohet gjatë orëve të natës, ndërsa gjatë pjesës tjetër të ditës synohet që furnizimi me ujë të vijojë normalisht.
