Rreth 2.5 milionë euro kamatëvonesa janë reduktuar gjatë vitit 2026 për familjarët dhe bizneset që kanë zgjedhur të shlyejnë detyrimet e prapambetura ndaj OSHEE.
Sipas të dhënave të kompanisë, deri tani janë lidhur 4,095 aktmarrëveshje me Furnizuesin e Shërbimit Universal, ndërsa 2,818 prej tyre, ose 68.8%, kanë përfunduar me pagesën e plotë të borxhit me një këst të vetëm.
Pjesa më e madhe e marrëveshjeve i përket familjarëve. Në total janë 2,893 raste, nga të cilat 1,928 klientë kanë paguar menjëherë dhe kanë përfituar ulje 70% të kamatëvonesës.
Ndërkohë, 965 familjarë kanë zgjedhur shlyerjen përmes kësteve.
Për klientët jofamiljarë janë lidhur 1,202 marrëveshje, ku përfshihen institucione buxhetore, subjekte jobuxhetore dhe biznese të vogla e të mëdha.
Skema mbulon detyrimet e krijuara deri në fund të vitit 2024, ndërsa për kategoritë në nevojë mund të përfshihen edhe detyrime të krijuara gjatë vitit 2025.
Për klientët buxhetorë dhe jobuxhetorë, pagesa mund të ndahet nga 24 deri në 120 këste, në varësi të shumës së borxhit.
Reduktimi ndryshon sipas kategorisë: familjarët përfitojnë ulje 70%, klientët jofamiljarë 50%, ndërsa bizneset e vogla përfitojnë falje të plotë të kamatëvonesës nëse paguajnë të gjithë detyrimin menjëherë.
