Kriza politike në Kosovë, Majko troç: Vendi rrezikon seriozisht të hyjë në paradhomën e shteteve të dështuara

Ish-ministri shqiptar, Pandeli Majko, ka reaguar me shqetësim ndaj bllokadës politike në Kosovë dhe vështirësive për zgjedhjen e presidentit të vendit, transmeton Gazeta Metro.

Majko ka deklaruar se zgjedhja e presidentit po shndërrohet në një “lojë vetëvrasëse”, ndërsa situata politike po e dëmton edhe mekanizmin e fundit për zgjidhjen e krizës.

“Zgjedhja e presidentit të Republikës në Prishtinë po kthehet në një ‘lojë’ vetëvrasëse”, ka shkruar ai.

Sipas tij, as zgjedhjet e parakohshme nuk po shihen më si rrugëdalje e sigurt, pasi rezultatet zgjedhore po e ruajnë të njëjtën gjendje të mosmarrëveshjeve politike.

“Votuesit kanë ‘ngrirë’ rezultatet dhe krizën e mosmarrëveshjes. Në kutinë e votimit, Kosova po mbetet jetime”, ka deklaruar ish-ministri shqiptar.

Ai ka paralajmëruar se vazhdimi i kësaj situate mund të ketë pasoja serioze për funksionimin e shtetit.

“Kosova rrezikon seriozisht të hyjë në paradhomën e shteteve të dështuara”, ka theksuar Majko.

Sipas tij, shpresa e fundit qëndron te heqja dorë nga bindja se dështimi i kundërshtarit politik mund të shërbejë si zgjidhje.

“Errësira e vërtetë nuk është ajo që njohim, por bindja se drita nuk do të vijë”, ka përfunduar Majko./gazetametro.net