Policia ka arrestuar këngëtarin Joz Marku dhe një tjetër person pas konfliktit të ndodhur pak ditë më parë pranë mbikalimit të Rinasit, ku u dhunua 26-vjeçari Eduart Kuçi.
Sipas Policisë së Tiranës, pas publikimit të pamjeve të konfliktit në rrjetet sociale, nisën verifikimet për identifikimin e personave të përfshirë.
Në përfundim të veprimeve hetimore, u ndalua J. M., 30 vjeç, i identifikuar si këngëtari Joz Marku. Ai dyshohet për disa vepra penale, mes tyre “Heqja e paligjshme e lirisë”, “Plagosja e lehtë me dashje” dhe “Kanosja”.
Në pranga ka përfunduar edhe K. N., 31 vjeç, i dyshuar se drejtonte automjetin tip “Land Rover” të përdorur gjatë ngjarjes. Gjatë kontrollit të banesës së tij, policia sekuestroi një sasi municioni, ndërsa automjeti u sekuestrua si provë materiale.
Policia bën me dije se Joz Marku, K. N. dhe persona të tjerë ende të paidentifikuar dyshohet se kanë dhunuar Eduart Kuçin, me pretendimin se 26-vjeçari kishte fyer një prej tyre.
Ndërkohë, dy persona të tjerë, A. H., 48 vjeç dhe K. V., 27 vjeç, janë shpallur në kërkim.
Hetimet vijojnë për zbardhjen e plotë të ngjarjes dhe identifikimin e personave të tjerë të përfshirë.