Dy raste zjarrvënieje janë zbardhur nga Policia e Fierit, ndërsa një 50-vjeçar është arrestuar në flagrancë dhe një tjetër shtetas është proceduar penalisht.
Ngjarjet janë regjistruar në fshatrat Daullas dhe Kreshpan, ku dyshohet se zjarret janë shkaktuar nga djegia e shkurreve dhe mbetjeve, por më pas kanë dalë jashtë kontrollit për shkak të përhapjes së flakëve.
Në Daullas, policia ka kapur pranë vatrës së zjarrit shtetasin A. G., 50 vjeç. Sipas autoriteteve, ai kishte ndezur zjarr në tokën e tij për të djegur shkurre, por flakët u përhapën duke përfshirë një sipërfaqe të madhe me bimësi.
Ndërkohë, në Kreshpan, shërbimet e policisë kanë identifikuar pranë një tjetër vatre zjarri shtetasin Q. Y. Ai ka deklaruar se kishte ndezur zjarr për djegien e mbetjeve, por era e fortë bëri që flakët të përhapeshin dhe të dilnin jashtë kontrollit, duke rrezikuar edhe disa banesa.
Për shkak të moshës, Q. Y. është proceduar penalisht, ndërsa materialet për të dyja rastet i janë referuar Prokurorisë për veprën penale “Shkatërrimi i pronës me zjarr”.
Policia e Fierit u ka bërë apel qytetarëve të shmangin djegien e mbetjeve bujqësore dhe pastrimin e tokave përmes zjarrit, pasi këto veprime mund të shkaktojnë përhapje të pakontrolluar të flakëve dhe të sjellin pasoja të rënda për njerëzit, pronën dhe mjedisin.