Duket si një shpikje e dalë nga një film fantastiko-shkencor, por në Japoni është tashmë realitet. Përballë temperaturave gjithnjë e më ekstreme të verës, është krijuar një kabinë ftohëse për njerëzit, e projektuar veçanërisht për punonjësit që kalojnë orë të tëra në vapë.

Pajisja quhet “Do Hiemon Box” dhe ngjan me një frigorifer gjigant ku mund të futet një person. Ajo po përdoret kryesisht në kantierë ndërtimi, fabrika, magazina dhe ambiente të tjera ku punonjësit ekspozohen ndaj temperaturave të larta.

Por si funksionon?

Brenda kabinës, sistemi drejton mbi trupin e personit rryma ajri të ftohtë me temperaturë rreth 5°C, duke synuar freskimin e shpejtë pas ekspozimit të gjatë në diell ose në ambiente të nxehta.

Nuk bëhet fjalë që e gjithë kabina të mbahet në temperaturën 5°C. Janë pikërisht rrymat e ajrit të ftohtë që drejtohen mbi trup dhe krijojnë efektin e freskimit.

Kabina është menduar kryesisht për t’u përdorur gjatë pushimeve në punë, kur trupi ka nevojë të ulë temperaturën pas qëndrimit për një kohë të gjatë në vapë.

Efekti mund të ndihet brenda pak minutash. Në një magazinë në Osaka, një punonjës tregoi se vetëm disa minuta brenda kabinës i mjaftuan për të tharë djersën dhe për të rifituar ndjesinë e mirëqenies.

Për të shmangur përdorimin për një kohë tepër të gjatë, pajisja është programuar që të fiket automatikisht pas 20 minutash.

“Frigoriferi për njerëzit” është afërsisht sa një kabinë telefonike dhe është instaluar kryesisht në vende pune ku ekspozimi ndaj nxehtësisë është i lartë.

Në një kohë kur temperaturat ekstreme po bëhen gjithnjë e më problematike për punonjësit, Japonia ka zgjedhur një zgjidhje të pazakontë: në vend që të freskojë të gjithë ambientin, freskon drejtpërdrejt njeriun.