José Mourinho do të përballet sërish me Interin, skuadër me të cilën shkroi një nga kapitujt më të lavdishëm të historisë së klubit zikaltër. Përballja do të zhvillohet në “Santiago Bernabeu”, aty ku më 22 maj 2010 portugezi udhëhoqi Interin drejt triumfit në Champions League, duke i dhënë klubit trofeun më të rëndësishëm evropian pas 45 vitesh.

Pas atij suksesi, Mourinho u largua nga Interi dhe mori drejtimin e Real Madridit. Tani, 16 vjet e gjysmë më vonë, ai rikthehet të drejtojë “Los Blancos”, me ambicien për të triumfuar sërish në Champions League.

Historia e përballjeve të tij me Interin pas largimit nga Milano, megjithatë, nuk është aspak në favorin e portugezit. Mourinho është përballur me ish-skuadrën e tij vetëm kur drejtonte Romën dhe bilanci është qartësisht në favor të zikaltërve: gjashtë ndeshje, një fitore për Romën dhe pesë humbje.

E vetmja fitore e Mourinho-s erdhi më 1 tetor 2022, kur Roma triumfoi 2-1 në “San Siro”. Në pesë ndeshjet e tjera fitoi Interi: Roma-Inter 0-3 më 4 dhjetor 2021, Inter-Roma 2-0 më 8 shkurt 2022, Roma-Inter 0-2 më 6 maj 2023, Inter-Roma 1-0 më 29 tetor 2023 dhe Roma-Inter 2-4 më 10 shkurt 2024.

Këtë herë situata është ndryshe. Mourinho drejton një Real Madrid shumë më të fortë dhe me objektiva maksimalë. Interi i Chivu do të ketë përballë jo vetëm një kundërshtar të madh, por edhe presionin e veçantë të “Bernabeut”. Një rikthim emocional për Mourinho-n, por një sfidë jashtëzakonisht e vështirë për Interin.