Një episod i diskutueshëm në ndeshjen Juventus-Milan ka hapur debat rreth golit të shënuar nga Cissé. Gjithçka nisi pak çaste më herët, kur Koni De Winter ndërhyri ndaj Randal Kolo Muani në një aksion që parapriu golin e skuadrës kuqezi.

Nga pamjet televizive duket se mbrojtësi i Milanit prek me thembrën e djathtë pjesën e përparme të këmbës së sulmuesit francez. Kontakti, i cilësuar si një “shkelje mbi këmbë”, është i dukshëm, megjithëse bëhet fjalë për një ndërhyrje të pjesshme dhe me intensitet të ulët.

Pikërisht këtu qëndron edhe debati. Sipas interpretimit të ri të situatave të tilla, episodi mund të jetë konsideruar shumë i lehtë për të ndërhyrë me VAR dhe për ta dërguar arbitrin në monitor. Megjithatë, një vit më parë, një kontakt i tillë mund të kishte çuar në anulimin e golit që erdhi menjëherë pas aksionit.

Pavarësisht polemikave, trajneri i Milanit, Spalletti, nuk pati ankesa ndaj arbitrimit dhe mbështeti vendimin e gjyqtarit Mariani.

“Mariani është një nga arbitrat më të fortë që kemi. Sipas meje, linja që po ndiqet është e duhura. Këto nuk janë faulle, arbitrat nuk i fishkëllejnë dhe është e drejtë të mos i fishkëllejnë. Gjithçka është në rregull. Nuk dua të ankohem për këto gjëra. Dua të shoh skuadrën time të luftojë deri në fund, siç bëri”, deklaroi Spalletti.

Kështu, episodi ndaj Kolo Muani mbetet një nga momentet më të diskutuara të Juventus-Milan, me kontaktin që ekzistoi, por që nuk u konsiderua i mjaftueshëm për ndërhyrjen e VAR-it.