Një ekip arkeologjik spanjollo-egjiptian ka zbuluar një fragment të rrallë të “Iliadës” së Homerit brenda një mumie, në vendndodhjen e lashtë të Oxyrhynchusit në Egjipt, raportojnë mediat ndërkombëtare.

Zbulimi është bërë në Al Bahnasa, rreth 190 kilometra në jug të Kajros, gjatë një misioni të përbashkët të Universitetit të Barcelonës dhe Institutit të Lindjes së Afërt të Lashtë.

Fragmenti u gjet në të ashtuquajturin “Varri 65”, një hipogje i dëmtuar dhe i grabitur që në lashtësi. Brenda tij, arkeologët dokumentuan një koleksion të pasur objektesh funerale, përfshirë disa mumie me fasha të zbukuruara me motive gjeometrike dhe ngjyra ende të ruajtura, sarkofagë druri shumëngjyrësh, si dhe objekte metalike, ndër to fletë të holla ari dhe një copë bakri.

Sipas studiuesve, këto materiale lidhen me praktikat funerale të periudhës greko-romake dhe pasqyrojnë ndërthurjen e traditave të lashta egjiptiane me ndikimet helenistike dhe romake.

Por zbulimi më i veçantë ishte një fragment papirusi i gjetur brenda njërës prej mumieve. Ai përmban vargje nga libri i dytë i “Iliadës”, pjesa e njohur si “Katalogu i Anijeve”, ku Homeri rendit forcat greke që u nisën drejt Trojës.

Papiruset janë të shumta në Oxyrhynchus, një prej qendrave më të rëndësishme për zbulimet e teksteve të lashta. Megjithatë, gjetja e një fragmenti letrar brenda një mumie është jashtëzakonisht e rrallë.

Studiuesit mendojnë se papirusi ishte ripërdorur si material për mbështjelljen e mumies. Kjo praktikë tregon se tekstet e shkruara mund të merrnin një përdorim të ri në jetën e përditshme, pasi nuk kishte domosdoshmërisht ndonjë funksion simbolik në kontekstin funerare.

Profesori Hassan Amer nga Universiteti i Kajros e ka cilësuar varrin si një dëshmi të rëndësishme për të kuptuar ndërthurjen e traditave funerare egjiptiane me ndikimet helenistike dhe romake.

Zbulimi ofron gjithashtu një pamje të veçantë mbi qarkullimin e letërsisë greke në Egjipt gjatë periudhës romake. Prania e vargjeve të Homerit në një material të ripërdorur për një mumie tregon se veprat klasike ishin pjesë e një kulture të shkruar që depërtonte në aspekte të ndryshme të jetës së përditshme.

“Iliada”, një nga veprat themelore të letërsisë së lashtë greke, rrëfen ngjarjet e lidhura me Luftën e Trojës dhe ndikimi i saj në kulturën evropiane ka vazhduar për më shumë se dy mijëvjeçarë.

Zbulimi në Al Bahnasa i shton një tjetër dëshmi historisë së gjatë të tekstit të Homerit dhe e forcon rëndësinë e rajonit të Al Minya-s si një prej qendrave kryesore për studimin e botës së lashtë mesdhetare./KultPlus.com