Rr. Ismail Qemali, Pallati 18, Kati 1, 1001, Tiranë, Shqipëri
“Shekulli Group”
TIRANË- Biznesmeni Ermal Beqiri, edhe pse i vënë në pranga në Francë, pasi ishte shpallur në kërkim nga Prokuroria e Posaçme, për aferat me AKSHI-n, vijon që të fitojë para nga shteti shqiptar, përmes tenderave. Një kompani e lidhur me biznesmenin është shpallur fituese e një tenderi të ri të lidhur me Agjencinë Kombëtare të Shoqërisë së Informacionit (AKSHI), ndërsa në garë janë skualifikuar tre operatorë që kishin paraqitur oferta me vlerë më të ulët.
Bëhet fjalë për procedurën me objekt “Loti 1 – Shërbimi i Internetit Linja 1 AKSHI”, të zhvilluar përmes Operatorit të Blerjeve të Përqendruara, që tashmë drejtohet nga Jonaid Myzyraj. Fitues është shpallur bashkimi i operatorëve NSolution sh.p.k. dhe HORIZON sh.p.k., me një ofertë prej 1,953,792 lekësh pa TVSH.
Ajo që bie në sy në këtë procedurë është se tre nga operatorët pjesëmarrës kishin paraqitur oferta më të ulëta se ajo e bashkimit fitues, por u skualifikuan gjatë procesit të vlerësimit.
Oferta më e ulët ishte ajo e Albanian Telecommunications Union (UNION), në vlerën 1,638,188 lekë pa TVSH. Pas saj renditej ONE Albania, me ofertë 1,695,744 lekë, ndërsa Abissnet kishte paraqitur ofertë prej 1,719,296 lekësh.
Të tre këta operatorë u skualifikuan dhe kontrata iu akordua bashkimit NSolution-HORIZON, pavarësisht se oferta e tij ishte rreth 235 mijë deri në 316 mijë lekë më e lartë se ofertat e tre operatorëve të skualifikuar.
Në garë morën pjesë gjithashtu Albanian Fiber Telecommunications, me një ofertë prej 2,051,300 lekësh, si dhe Albanian Satellite Communications, me ofertë prej 14,576,640 lekësh.
Sipas dokumentacionit të procedurës, skualifikimet janë bërë për mospërmbushje të kërkesave të përcaktuara në dokumentet e tenderit. Për UNION, në verifikimin e dokumentacionit është evidentuar edhe mungesa e dokumentacionit të kërkuar për kriterin që lidhet me mosdënimin për vepra penale. Për operatorët e tjerë, në dokumentacion janë evidentuar problematika lidhur me përmbushjen e kërkesave ligjore dhe teknike.
Fondi limit i procedurës ishte 2,244,094 lekë pa TVSH, ndërsa oferta e bashkimit NSolution-HORIZON ishte rreth 1.95 milionë lekë pa TVSH.
Tenderi merr një vëmendje të veçantë për shkak të lidhjes së NSolution me biznesmenin Ermal Beqiri, i cili aktualisht ndodhet i arrestuar në Francë, ndërsa autoritetet shqiptare kanë ndjekur procedurat për ekstradimin e tij.
Procedura mban numrin e referencës REF-88311-06-01-2026 dhe është shpallur më 4 shtator 2026.
Fakti që një kompani e lidhur me Beqirin ka fituar një kontratë të re publike, ndërkohë që në garë kishte oferta më të ulëta që u skualifikuan, pritet të ngrejë pikëpyetje mbi kriteret dhe procesin e vlerësimit të kësaj procedure. Ndërkohë që një pjesë e mirë e kontratave që kompanitë e Beqirit kanë lidhur me AKSHI-n nuk janë publike, për shkak të konfidencialitetit, ndërkohë që asnjë prej tenderave të dhënë më herët nuk është anuluar. Vetë Beqiri po kërkon të shmangë ekstradimin drejt Shqipërisë, ku e presin disa akuza të rënda për dosjen AKSHI, ndërsa së fundi u vu në pranga dhe Ergys Agasi, i cili është i dyshuar si bashkëpunëtor i tij. /SHEKULLI
Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.
KOMUNITETI SHEKULLI ONLINE: https://www.facebook.com/groups/1381242728701899/
.jpg)
