Komisioni Europian ka reaguar lidhur me ceremoninë mortore të Ratko Mlladiçit në Beograd, duke i kujtuar Serbisë se glorifikimi i kriminelëve të luftës, mohimi i gjenocidit dhe revizionizmi nuk kanë vend në Bashkimin Europian dhe as në vendet që synojnë anëtarësimin në të.
Reagimi erdhi ndërsa në kryeqytetin serb po zhvillohej ceremonia mortore e ish-komandantit të Ushtrisë së Republikës Srpska, i dënuar me burgim të përjetshëm për gjenocid, krime kundër njerëzimit dhe krime lufte.
Në ceremoni morën pjesë katër ministra të qeverisë serbe, Danilo Vuçiç, djali i presidentit Aleksandër Vuçiç, si edhe zyrtarë të tjerë nga Serbia dhe Republika Srpska. Prania e përfaqësuesve të lartë shtetërorë në homazhet për Mlladiçin ka tërhequr vëmendjen e Brukselit, në një kohë kur Serbia vazhdon procesin e saj të anëtarësimit në BE.
Zëdhënësi i Komisionit Europian, Kristian Vigand, shkroi në rrjetet sociale se lavdërimi i kriminelëve të luftës, mohimi i gjenocidit dhe revizionizmi nuk kanë vend as në Bashkimin Europian dhe as në vendet kandidate për anëtarësim.
“Mlladiçi ishte një kriminel lufte i dënuar për krime lufte, gjenocid dhe krime kundër njerëzimit. Ai vdiq duke vuajtur dënimin me burgim të përjetshëm për gjenocidin në Srebrenicë. Gjykata Penale Ndërkombëtare për ish-Jugosllavinë e dënoi me burgim të përjetshëm në vitin 2017, duke i cilësuar krimet e tij si ndër më të tmerrshmet që njeh njerëzimi”, thuhet në deklaratë.
Ceremonia në Beograd u shoqërua me homazhe për ish-komandantin ushtarak serb të Bosnjës, ndërsa pjesëmarrja e figurave politike dhe shtetërore serbe i dha ngjarjes edhe një dimension politik. Mlladiçi u varros pranë vajzës së tij, Ana, e cila vdiq në vitin 1994.
Ratko Mlladiç drejtoi Ushtrinë e Republikës Srpska gjatë luftës në Bosnje dhe Hercegovinë, nga viti 1992 deri më 1995.
Gjykata Penale Ndërkombëtare për ish-Jugosllavinë e shpalli fajtor, ndër të tjera, për gjenocidin e Srebrenicës në korrik 1995, ku u vranë më shumë se 8 mijë burra dhe djem boshnjakë myslimanë, si dhe për krime të lidhura me rrethimin e Sarajevës. Dënimi i tij me burgim të përjetshëm u konfirmua në apel në vitin 2021.
