Seanca e pasafatshme e së mërkurës, deputetët në dilema?

Vazhdimi i seancës konstituive për të mërkurën ka krijuar dilema ligjore tek subjektetet ish-opozitare për shkak të tejkalimit të të gjitha afateve kushtetuese. Fillimisht u tejkalua afati kushtetues prej 30 ditëve për konstituimin e Kuvendit e më pas edhe një afat tjetër 30 ditor të interpretuar nga LVV. Kryesuesi i seancës, deputeti Avni Dehari, vendosi vazhdimin e seancës konstitive më 9 shtator. Megjithatë, pavarësisht dilemave ligjore që mund të dalin në seancën e pasafatshme të së mërkurës, deputetët e LDK-së e kanë konfirmuar pjesëmarrjen e tyre. Por, deputetja e kësaj partie, Jehona Lushaku gjithashtu la të hapur mundësinë që të shqyrtohet në kushtetuese shkelja e afateve për konstituimin e Kuvendit.

““Vendosëm si grup që të marrim pjesë në këtë seancë dhe t’i kontribuojmë konstituimit të Kuvendit, meqenëse Kosova është në një fazë të rëndësishme për themelimin e institucioneve dhe funksionalitetin e saj. Ne kemi bërë thirrje që të konstituohet Kuvendi sa më parë dhe institucioneve t’iu kthehet funksionaliteti i tyre”

Partia Demokratike e Kosovës, pas protestave të përditshme dhe kërkesave për thirrje të seancës konstituive, në fundjavë paralajmëroi fazë të re veprimesh. Deputet të PDK-së, kanë paralajmëruar edhe ankesë në kushtetuese për çdo veprim në Kuvend pas 7 gushtit, afati i fundit i përcaktuar nga Kushtetuesja për konstiuimin e Kuvendit. Ndërkohë, në pikëpyetje pjesëmarrjen e tyre në vazhdimin e seancës konstituive e lanë Aleanca. Deputeti Burim Ramadani tha se veprimet politike të Aleancës përfshirë mundësinë e ankimimit në kushtetuese do të mësohen me kohë. Por, Ramadani tha se oferta prej 6 pikave që kjo parti kishte për LVV-në në mënyrë që të krijohet kuorumi për votimin e presidentit të ri, ka përfunduar pas refuzimit të kryetarit të LVV-së.

“Ajo çështje ka përfundu oferta e Aleancës është refuzu më 1 shtator kur për herë të parë ka folur Kurti e ka refuzu. Hera e parë dhe e vetme që ka folë për atë ofertë ka qenë me 1 shtator e ka refuzu", tha Ramadani për rtv21

Seanca kontituive u ndërpre dy herë gjatë muajit gusht, kur kryetari i LVV-së, Albin Kurti kërkoi më shumë kohë për arritjen e një marrëveshjeje për presidentin. Herën e dytë më 8 gusht, deputetja e Aleancës, Time Kadrijaj, goditi me ve Kurtin, dhe që nga ajo ditë Dehari më nuk e ftoi seancën. Ndërkohë, drejtori i institutit kosovar për drejtësi Ehat Miftaraj, vlerëson se edhe pse seanca e 9 shtatorit është e pasafatshme dhe në shkelje kushtetuese, deputetët e subjekteve politike duhet të kontribuojnë në formimin e institucioneve. Miftaraj, vlerëson se nëse nga kjo legjislaturë do të zgjidhet një president, ai do të jetë legjitim.

“Po sepse qeveria dhe presidenti nuk janë fajtor pse deputetët janë të papërgjegjshëm apo kryesuesi i seancës Avni Dehari vendos të shkelë kushtetutën me qëllim dhe tejkalon afatet kushtetuese. Pra pushtetet janë të ndara shkeljën kushtetuese e ka bërë kryesuesi i seancës...”, deklaroi ai për rtv21

Lidhur me legjitimitetin e presidentit të ri, i cili eventualisht mund të votohet, ekspertët juridik kanë interpretime të ndryshme. Megjithatë, ata në vazhdimësi kanë përmendur nevojën që kjo çështje të marr një përgjigje nga Gjykata Kushtetuese për të bllokuar mundësinë që tejkalimi i afateve kushtetuese të bëhet normë në të ardhmen./RTV21/21Media