Funerali me nderime shtetërore i Mlladiç, Mbretëria e Bashkuar thërret të Ngarkuarin me Punë të Serbisë

E dërguara e posaçme e Mbretërisë së Bashkuar për Ballkanin Perëndimor, Dame Karen Pierce, thirri të Ngarkuarin me Punë të Serbisë për të dënuar përfshirjen e zyrtarëve shtetërorë dhe ushtarakë serbë në funeralin e Ratko Mladiç, bën me dije qeveria e Mbretërisë së Bashkuar.   

Ministri për Evropën i Mbretërisë së Bashkuar, Lord Wood i Anfieldit, tha:  

“Si komandant ushtarak, Mlladiç drejtoi krime që janë ndër më të këqijat e kryera në Evropë që nga Lufta e Dytë Botërore. Ai u dënua nga një gjykatë e pavarur e OKB-së për gjenocid, krime kundër njerëzimit dhe krime lufte. Mohimi dhe fshehja e krimeve të tij është një fyerje ndaj së drejtës ndërkombëtare dhe dëmton drejtpërdrejt stabilitetin dhe besimin rajonal.  

Mendimet e Qeverisë së Mbretërisë së Bashkuar janë me viktimat e Mladiçit dhe familjet e tyre. Ata meritojnë respekt, dhembshuri dhe llogaridhënie, jo përpjekje për të rishkruar historinë e provuar. Udhëheqësit politikë dhe institucionet publike kanë përgjegjësi të shohin drejt së ardhmes, jo drejt së kaluarës, dhe të veprojnë në mënyra që mbështesin pajtimin rajonal, jo të rihapin plagët e vjetra.  

Tribunali Ndërkombëtar Penal për ish-Jugosllavinë u krijua nga Këshilli i Sigurimit i OKB-së dhe Serbia është e detyruar të respektojë vendimet e tij.  

Kjo është arsyeja pse sot thirrëm të Ngarkuarin me Punë të Serbisë. Lartësimi i një krimineli lufte të dënuar dëmton drejtpërdrejt besimin, nxit përçarjen dhe është i papajtueshëm me procesin e pajtimit brenda Bosnjës dhe Hercegovinës dhe rajonit.  

Mbretëria e Bashkuar mbetet e përkushtuar fuqimisht ndaj drejtësisë ndërkombëtare, llogaridhënies dhe pajtimit të qëndrueshëm në të gjithë Ballkanin Perëndimor dhe do të vazhdojë të punojë me partnerë në të gjithë rajonin dhe në nivel ndërkombëtar në mbështetje të paqes, drejtësisë dhe një të ardhmeje të sigurt dhe të begatë për të gjitha komunitetet”.