Gazetarja e CNN, Isa Soares, ka shprehur sërish mbështetjen e saj për protestën e qytetarëve shqiptarë, të cilët prej tre muajsh vijojnë të protestojnë në bulevardin përpara Kryeministrisë, duke kërkuar largimin e qeverisë Rama.
Me anë të një reagimi në rrjetet sociale, Soares ka shkruar: “Dita e 100-të e Revolucionit të Flamingove”, duke e shoqëruar postimin me një fotografi të saj.
Ky nuk është reagimi i parë i gazetares së CNN në mbështetje të protestuesve shqiptarë. Disa javë më parë, Isa Soares publikoi mesazhet që kishte marrë nga protestuesit, të cilët shprehën pakënaqësitë e tyre ndaj kryeministrit Edi Rama dhe mënyrës së qeverisjes.
Me postimin e fundit, gazetarja ka shprehur edhe një herë mbështetjen e saj për protestën, e cila këtë të martë shënon ditën e 101-të.
Sot mbushen 101 ditë nga nisja e protestave kundër qeverisë së Edi Ramës. Protesta nisi në Zvernec, pas incidentit ku rojet private tërhoqën zvarrë disa qytetarë që po protestonin kundër rrethimit të zonës.
Nga protesta për kundërshtimin e projektit në Zvërnec, tubimi u zgjerua dhe mori një dimension tjetër politik, me thirrje kundër qeverisë Rama dhe gjithë klasës politike.
Prej më shumë tre muajsh, tashmë Tiranë është shndërruar në epiqendrën e protestave kundër qeverisë Rama, me qytetarë që mblidhen çdo ditë në rrugët e kryeqytetit për të kërkuar ndryshime politike.
Tubimet janë mbajtur çdo ditë, duke krijuar një formë të re proteste politike në vend, e cika ka tërhequr edhe vëmendjen e ndërkombëtarëve. Përballë Kryeministrisë janë bërë thirrje kundër qeverisë, e kundër gjithë klasës politike, “Rama në burg, Berisha në burg”.
