Dy grabitje janë shënuar gjatë 10 ditëve të fundit në qarkun e Beratit, ku dy biznesmenë janë bërë pre e grabitjeve gjatë orëve të natës.
Sipas raportimeve në media, më të dyja rastet, autorët kanë përdorur të njëjtën skemë, duke hyrë me forcë në ambiente dhe duke marrë kasafortat.
Një prej vjedhjeve ka ndodhur në biznesin “Veza e Mëngjesit”, përgjatë aksit nacional Berat-Dimal, me pronar shtetasin Leonard Fani. Hajdutët kanë shqyer derën kryesore të objektit dhe më pas kanë marrë kasafortën.
Rasti tjetër është regjistruar në banesën e shtetasit Lumnir Osoja, pronar i kompanisë “Center Albania”. Edhe këtu, raportohet se autorët kanë hyrë duke dëmtuar derën kryesore dhe kanë marrë kasafortën nga ambientet e banesës.
Sipas pretendimeve të depozituara nga vetë biznesmenët gjatë denoncimeve në polici, në secilën prej kasafortave ndodheshin rreth 100 milionë lekë.
Sipas të njëjtave burime, dyshohet se pas vjedhjeve qëndron një grup prej disa personash. Autorët kanë vepruar të maskuar, duke përdorur maska dhe kapuça për të fshehur identitetin.
Në kuadër të hetimeve, policia ka sekuestruar kamerat e sigurisë së biznesit dhe të banesës së biznesmenit. Megjithatë, deri më tani nuk është bërë i mundur identifikimi dhe arrestimi i autorëve.
