Protesta qytetare kundër qeverisë vijon edhe sot në Tiranë, duke shënuar ditën e 101-të të rezistencës, pas tubimit të 100-të që u zhvillua mbrëmjen e kaluar në kryeqytet.
Prej më shumë se tre muajsh, qytetarë dhe aktivistë janë mbledhur në mënyrë të vazhdueshme në Tiranë, duke kërkuar dorëheqjen e kryeministrit Edi Rama dhe ndryshime në drejtimin politik të vendit.
Protestat janë zhvilluar në forma të ndryshme, me grumbullime qytetarësh, marshime në rrugët e kryeqytetit, pankarta dhe thirrje kundër qeverisë.
Protesta e 100-të, tubim para Kryeministrisë
Mbrëmjen e kaluar u zhvillua protesta e 100-të, e cila nisi me grumbullimin e qytetarëve në sheshin “Skënderbej” dhe vijoi më pas në drejtim të zonës përpara Kryeministrisë.
Gjatë tubimit, protestuesit përsëritën kërkesën e tyre për largimin e Edi Ramës nga posti i kryeministrit. Mes thirrjeve të dëgjuara gjatë protestës ishin “Rama jep dorëheqjen” dhe “Ju erdhi fundi”.
Tubimi u shoqërua edhe me paralajmërime për intensifikimin e aksionit qytetar në ditët në vijim. Aktivistë dhe protestues deklaruan se rezistenca do të hyjë në një fazë të re, ndërsa u bënë thirrje qytetarëve për një pjesëmarrje edhe më të madhe në protestat e ardhshme.
Dita e 101-të, protesta zhvendoset para Kuvendit
Sot, me nisjen e ditës së 101-të të protestës, qytetarët pritet të rikthehen në rrugët e Tiranës me të njëjtën kërkesë kryesore: dorëheqjen e kryeministrit Edi Rama.
Organizatorët dhe aktivistët kanë bërë thirrje për pjesëmarrje masive, ndërsa protesta pritet të nisë me grumbullimin e qytetarëve dhe të vijojë me marshim në rrugët e kryeqytetit.
Tubimi i sotëm zhvillohet në një moment kur Kuvendi ka nisur sesionin e ri parlamentar, çka pritet ta vendosë protestën edhe më pranë qendrës së aktivitetit politik në vend.
Pas 101 ditësh protestash të njëpasnjëshme, organizatorët synojnë që presioni qytetar ndaj qeverisë të vijojë, ndërsa mbetet për t’u parë nëse aksioni protestues do të marrë formën e një lëvizjeje edhe më të gjerë gjatë ditëve të ardhshme.
