Kryeministri i Serbisë, Gjuro Macut, i ka kërkuar zyrtarisht presidentit Aleksandër Vuçiç shpërndarjen e Kuvendit, duke hapur rrugën për zgjedhje të parakohshme parlamentare.
Sipas Kushtetutës së Serbisë, presidenti mund ta shpërndajë Kuvendin me propozim të arsyetuar të Qeverisë. Në të njëjtën kohë, presidenti shpall edhe zgjedhjet parlamentare, të cilat duhet të përfundojnë jo më vonë se 60 ditë nga shpallja e tyre.
Zgjedhjet e reja ishin paralajmëruar më herët nga Vuçiç, i cili ka deklaruar se ato mund të zhvillohen më 18 ose 25 tetor.
Kërkesa për zgjedhje të parakohshme vjen pas muajsh protestash të udhëhequra nga studentët, të cilët që prej majit 2025 kanë mbajtur të bllokuara fakultetet dhe kanë kërkuar përgjegjësi për vdekjen e 16 personave në incidentin e nëntorit 2024 në Stacionin Hekurudhor të Novi Sadit.
Pushteti serb ka paralajmëruar disa herë zgjedhje të parakohshme, ndërsa vetë Vuçiç ka deklaruar se synon të largohet nga posti i presidentit para përfundimit të mandatit të tij në prill 2027.
Por zhvillimi më i rëndësishëm politik lidhet me të ardhmen e tij pas presidencës.
Pak ditë më parë, asambleja e partisë së Vuçiçit miratoi unanimisht kandidaturën e tij si kandidati i vetëm për postin e kryeministrit në zgjedhjet e ardhshme parlamentare.
Nëse zgjedhjet zhvillohen sipas skenarit të paralajmëruar dhe Vuçiç merr mandatin për të formuar qeverinë, Serbia mund të përballet me një “rokadë” të pushtetit, ku ai do të largohej nga presidenca për të marrë drejtimin e qeverisë.
#Serbi #Vuçiç #AleksandarVucic #GjuroMacut #Zgjedhje #Beograd #Politikë #Protesta #Studentët #NoviSad #Ballkan