Kryeministri Edi Rama ka bërë të ditur se ka nisur procesi i integrimit të inteligjencës artificiale në administratën publike, ndërsa synimi është që përdorimi i saj të shtrihet gradualisht në të gjitha nivelet e administratës.
Gjatë Forumit të Dytë të Inovacionit, i cili u fokusua te inteligjenca artificiale dhe zhvillimi i sektorit teknologjik në Shqipëri, Rama tha se procesi ka nisur fillimisht në drejtoritë juridike.
Sipas kryeministrit, përdorimi i modeleve të inteligjencës artificiale do t’u mundësojë punonjësve të administratës akses në një asistencë të avancuar teknologjike, e cila do të përdoret në vijim në të gjitha nivelet e institucioneve publike.
“Kemi filluar një proces integrimi të moduleve të inteligjencës artificiale me administratën publike në nivelin e parë, fillimisht me drejtoritë juridike dhe do të shtrihemi në të gjitha nivelet për t’i dhënë mundësi administratës që të ketë në dispozicion një asistencë jashtëzakonisht të kualifikuar përmes moduleve të inteligjencës artificiale”, u shpreh Rama.
Kreu i qeverisë deklaroi gjithashtu se programi kombëtar për aftësimin në teknologjinë e inteligjencës artificiale do të jetë i hapur për individët, ndërsa për administratën publike synohet që ai të bëhet i detyrueshëm.
Në fjalën e tij, Rama u ndal edhe te mbështetja për inovacionin dhe kërkimin e aplikuar. Ai paralajmëroi rritjen e granteve përmes Fondit të Inovacionit, me fokus te kërkimi i aplikuar dhe partneritetet mes universiteteve dhe industrisë.
Sipas tij, pikërisht lidhja mes universiteteve dhe sektorit të industrisë mbetet një prej fushave ku Shqipëria ka ende vështirësi dhe prapambetje më të madhe.