Rr. Ismail Qemali, Pallati 18, Kati 1, 1001, Tiranë, Shqipëri
“Shekulli Group”
Vetëm pak orë pas vrasjes së 24-vjeçarit Ylber Luli në Shkodër, drejtori i Përgjithshëm i Policisë së Shtetit, Skënder Hita, ka zhvilluar një takim me drejtuesit e strukturave vendore të Policisë.
Në fokus të takimit ka qenë situata kriminale në qarkun e Shkodrës dhe rezultatet e strukturave policore në parandalimin dhe goditjen e kriminalitetit.
Hita ka shprehur kritika për performancën e strukturave vendore, duke e cilësuar Shkodrën si një qark problematik dhe duke theksuar se rezultatet e policisë nuk janë ende në nivelin e kërkuar.
‘Na duhen sa më shpejt rezultate konkrete’, mësohet të ketë thënë Hita, para drejtuesve lokalë të policisë së Shkodrës, qark të cilin e ka drejtuar edhe vetë për disa muaj.
Reagimi i kreut të Policisë së Shtetit vjen pas ngjarjes së rëndë të mëngjesit të sotëm, ku një konflikt mes tre personave përfundoi me vrasjen e 24-vjeçarit Ylber Luli dhe plagosjen e dy personave të tjerë.
Sipas të dhënave paraprake, konflikti ka nisur pas një përplasjeje mes të rinjve dhe më pas ka vijuar pranë banesës së viktimës. Në përleshje është përdorur edhe armë zjarri, ndërsa policia ka arrestuar 25-vjeçarin Andri Vulaj.
Përveç ngjarjes së ditës së sotme, e pazbardhur mbetet dhe vrasja e babë e bir në Dukagjin, si dhe rastet e shumta të kultivimit të bimëve narkotike.
Drejtoria e Policisë së Shtetit ka kërkuar nga strukturat vendore rritjen e angazhimit dhe përmirësimin e rezultateve në luftën kundër kriminalitetit, veçanërisht në zonat e konsideruara problematike.
Takimi i zhvilluar pas vrasjes pritet të pasohet edhe nga masa të tjera organizative për rritjen e prezencës dhe reagimit policor në qarkun e Shkodrës.
Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.
KOMUNITETI SHEKULLI ONLINE: https://www.facebook.com/groups/1381242728701899/
.jpg)
