A do ta linit një robot humanoid t’ju pastronte shtëpinë për 26 euro në orë?

Kompania thotë se kërkesa po rritet dhe klientët e interesuar tashmë po regjistrohen në një listë pritjeje…

Një robot që fshin me fshesë me korrent, pastron tualetet dhe sipërfaqet e kuzhinës për 26 euro në orë ka nisur tashmë të hyjë në shtëpitë e San Franciskos, në Shtetet e Bashkuara.

Startup-i amerikan Tau Robotics po ofron robotët e tij humanoidë si pastrues shtëpiakë, duke u besuar atyre punë komplekse dhe të ndryshme të shtëpisë, të cilat kompanitë e robotikës prej vitesh përpiqen t’i automatizojnë.

Shërbimi funksionon prej rreth një muaji dhe robotët kanë pastruar tashmë më shumë se 50 apartamente në të gjithë qytetin. Sipas kompanisë, kërkesa po rritet dhe klientët e rinj tashmë duhet të futen në një listë pritjeje.

Tammie Siew e ka provuar për herë të parë robotin humanoid për pastrimin e apartamentit të saj.

“Fakti që pengohet pak pothuajse e bën të këndshëm. Është pak a shumë si të shohësh një fëmijë”, thotë Siew.

“Mendoj se në njëfarë mënyre kështu po hyn në shoqëri. Nuk bëhet fjalë të presim që të jetë krejtësisht i përsosur.”

Për Siew, arsyeja për ta përdorur është e thjeshtë: ka disa punë shtëpie që ajo do t’ia delegonte me shumë dëshirë një makinerie.

“Nuk dua të pastroj tualetin. Jam e gatshme të pres pak më gjatë dhe ndërkohë të lexoj një libër ose të bëj ndonjë punë. Kështu që jam shumë e entuziazmuar”, thotë ajo.

Sipas Tau Robotics, robotët përdorin kamera dhe të dhëna mbi thellësinë e hapësirës, të cilat i ndihmojnë të perceptojnë mjedisin përreth. Ata janë projektuar për të funksionuar në shtëpi të zakonshme.

Kompania thotë se robotët mund të pastrojnë dyshemetë me fshesë me korrent, të sistemojnë rrëmujën, të nxjerrin plehrat dhe të pastrojnë sipërfaqet. Ata mund të lëvizin edhe objekte të zakonshme shtëpiake, si karrige, kosha rrobash dhe tavolina të vogla, për të pastruar hapësirat përreth tyre.

Dhe të kesh një “pastrues robotik” mund të mos jetë aq e shtrenjtë sa mund të mendohet.

Për momentin, robotët mund të punojnë vetëm për një orë pa ndërprerje. Një seancë me një robot kushton 30 dollarë, ose rreth 25.7 euro, ndërsa dërgimi i dy robotëve kushton 60 dollarë, rreth 51.5 euro.

Kompania thotë se në të ardhmen planifikon të ofrojë seanca pastrimi me kohëzgjatje më të madhe, duke u dhënë klientëve më shumë mundësi zgjedhjeje.

Robotët humanoidë dalin nga faza e demonstrimit

Robotët humanoidë prej kohësh paraqiten si një teknologji e së ardhmes, por aftësitë e kufizuara në lëvizje, shpejtësia dhe besueshmëria e tyre e kanë bërë të vështirë që ata të kryejnë punë të përditshme vërtet të dobishme.

Tau Robotics thotë se makineritë e saj tashmë mund të realizojnë një sërë detyrash shtëpiake, por pranon se ende nuk janë aq të shpejta apo të afta sa një person që merret profesionalisht me pastrimin.

Dhe, të paktën për momentin, ato nuk janë autonome.

Çdo robot kontrollohet në distancë nga një operator njerëzor i trajnuar, i cili gjatë punës mund të shohë ambientet e shtëpisë përmes kamerave të instaluara në robot.

Përdorimi i kamerave dhe sensorëve të tjerë nga robotët brenda banesave private ka ngritur shqetësime për privatësinë.

Krijimi i makinerive të afta të punojnë në mënyrë autonome në ambiente të çrregullta dhe të paparashikueshme kërkon sasi të mëdha të dhënash trajnimi nga bota reale. Por mbledhja e këtyre të dhënave brenda shtëpive të njerëzve ngre në mënyrë të pashmangshme pikëpyetje mbi privatësinë.

Sipas politikës së privatësisë së Tau Robotics, seancat e pastrimit regjistrohen vazhdimisht përmes kamerave të vendosura në kokën dhe kyçet e robotit, ndërsa të dhënat e thellësisë regjistrojnë organizimin e dhomave dhe pozicionimin e objekteve.

Dokumenti përcakton se pamjet e regjistruara dhe të dhënat e tjera të mbledhura nga roboti përdoren për trajnimin e modeleve të inteligjencës artificiale të kompanisë dhe ruhen për një periudhë të pacaktuar, përveç rasteve kur klientët kërkojnë fshirjen e tyre. Mikrofonat, ndërkohë, janë të çaktivizuar dhe nuk regjistrohet audio.

Kompania thotë se nuk i shet të dhënat personale të klientëve dhe nuk i përdor regjistrimet për reklama të bazuara në sjelljen e përdoruesve.

Tau Robotics deklaron se objektivi i saj afatgjatë është të rrisë gradualisht autonominë e robotëve, ndërsa ata “mësojnë” nga punët reale të pastrimit.

Kompania planifikon gjithashtu ta zgjerojë përdorimin e tyre edhe në fusha të tjera, nga riparimet dhe mirëmbajtja e shtëpive deri te kujdesi për të moshuarit./EURONEWS