Pagat e gjyqësorit, administrata bojkoton shërbimet në Gjykatën e Tiranës

Administrata dhe sekretarët gjyqësorë në Dhomën Civile të Gjykatës së Tiranës kanë nisur këtë të martë bojkotin e shërbimeve, në shenjë proteste për moskalimin e pagave të reja.

Punonjësit kanë kërkuar sqarime për situatën e krijuar, ndërsa shqetësimi kryesor lidhet me moskalimin e pagave sipas skemës së re të miratuar. “Çfarë do të bëhet me ne?”, është pyetja që ngrihet nga punonjësit e administratës dhe sekretarët gjyqësorë.

Bojkoti ka sjellë bllokimin e shërbimeve në Dhomën Civile të Gjykatës së Tiranës, ndërsa pritet që problematika të diskutohet edhe në nivel drejtuesish.

Bojkotit i është bashkuar edhe Dhoma Penale e Gjykatës së Tiranës si dhe Gjykata e Apelit të Juridiksionit të Përgjithshëm..

Në orën 15:00, të gjithë kryetarët e gjykatave do të mblidhen në Gjykatën e Lartë për të diskutuar situatën e krijuar dhe problematikën lidhur me pagat.

Edhe në sistemin e prokurorisë është zhvilluar një takim për këtë çështje. Kryeprokurori Olsian Çela ka mbledhur prej orës 10:00 drejtuesit e prokurorive për të diskutuar problematikën.

Për pagat e reja të magjistratëve është shprehur edhe Gjykata Kushtetuese, e cila ka theksuar se arsyetimi dhe dispozitivi i vendimit të saj përbëjnë qëndrimin zyrtar dhe duhet të zbatohen në tërësinë e tyre. Gjykata ka rikujtuar se vendimet e saj janë përfundimtare dhe të detyrueshme për zbatim.