Kremlini ka konfirmuar se presidenti amerikan Donald Trump ka zhvilluar një bisedë telefonike me Presidentin rus Vladimir Putin ditën e sotme, ku në fikus të bisedës ishin përpjekjet diplomatike të Uashingtonit për t'i dhënë fund luftës në Ukrainë.
Sipas këshilltarit të Kremlinit, Yuri Ushakov, telefonata erdhi pas një turi kontaktesh intensive të dy të dërguarve të Trump, Steve Witkoff dhe Jared Kushner, të cilët më 5 shtator u takuan në Moskë me Putinin dhe më 6 shtator udhëtuan për herë të parë në Kiev për takim me Presidentin ukrainas Volodymyr Zelensky dhe udhëheqjen ukrainase.
Shtëpia e Bardhë e përshkroi takimin në Moskë si diskutim mbi "plane të konsiderueshme për hapat e ardhshëm", por pa njoftuar ndonjë marrëveshje konkrete.
Gjatë telefonatës, Putin i ka paraqitur Trumpit qasjen e tij për procesin e paqes dhe e ka siguruar se Rusia nuk ka plane agresive kundër Evropës.
Nga ana tjetër, Trump theksoi nevojën për t'i dhënë fund konfliktit në Ukrainë, duke thënë se kjo do të hapte rrugën për një rivendosje të marrëdhënieve mes Rusisë dhe SHBA-ve, tha Ushakov.
Në tryezë u hodh edhe ideja për një ndërprerje të ndërsjellë të sulmeve ajrore, por sipas burimeve të cituara nga Kyiv Independent, nuk u arrit asnjë marreveshje. Rusia deri tani ka pranuar vetëm një pauzë tre-ditore të sulmeve ndaj kryeqyteteve gjatë vizitave të të dërguarve amerikanë.
Sipas një zyrtari amerikan të cituar më 6 shtator, Trump fillimisht u informua në detaje nga Witkoff dhe Kushner dhe më pas telefonoi Putinin. Pritet që presidenti amerikan të kontaktojë së shpejti edhe Presidentin Zelensky.
Sondazh
Lexo gjithashtu
