Shqipëria ka dënuar ashpër lavdërimin e kriminelit të luftës Ratko Mlladiç, i cili vdiq teksa vuante dënimin me burgim të përjetshëm për gjenocid, krime kundër njerëzimit dhe krime lufte.
Në një reagim zyrtar, Ministri për Evropën dhe Punët e Jashtme, Ferit Hoxha, deklaroi se Shqipëria i bashkohet Bashkimit Evropian dhe liderëve të tij që kanë dënuar mënyrën se si Mlladiç u nderua dhe u përkujtua në Serbi.
"Shqipëria dënon lavdërimin e Ratko Mlladiçit, një kriminel lufte i dënuar që vdiq teksa vuante dënimin me burgim të përjetshëm për gjenocid, krime kundër njerëzimit dhe krime lufte. Ne i bashkohemi Bashkimit Evropian, liderëve të tij dhe të gjithë atyre që kanë dënuar me të drejtë mënyrën se si ai u nderua dhe u përkujtua në Serbi", thuhet në deklaratën e ministrisë.
Sipas Ministrisë së Jashtme, qëndrimi i Shqipërisë ka qenë i qartë dhe mbetet i qëndrueshëm.
"Lavdërimi i kriminelëve të luftës të dënuar, mohimi i gjenocidit dhe revizionizmi historik bien ndesh me vlerat mbi të cilat është ndërtuar projekti evropian dhe minojnë frymën e pajtimit, bashkëpunimit dhe marrëdhënieve të fqinjësisë së mirë që janë thelbësore për një të ardhme të përbashkët në Ballkanin Perëndimor. Këto akte bëjnë më shumë sesa rihapin plagët e së shkuarës. Ato çnderojnë viktimat dhe të mbijetuarit, gërryejnë besimin mes komuniteteve dhe njerëzve."
Në reagimin e tij të mëparshëm pas vdekjes së Mlladiçit më 27 gusht, Ministri Hoxha e kishte cilësuar atë si një "vrasës brutal" dhe kishte theksuar se vdekja nuk e fshin fajin.
"Por, vdekja, në të dyja rastet, qoftë e një personi të dënuar apo të një personi ndaj të cilit është dhënë një dënim, nuk e fshin fajin dhe as nuk mund të rishkruajë të dhënat historike. Srebrenica, Sarajeva, Kosova dhe të gjitha viktimat e luftërave në ish-Jugosllavi nuk meritojnë as harresën dhe as revizionimin", vijon Hoxha.
Në deklaratën e fundit theksohet se Shqipëria beson se pajtimi i vërtetë ndërtohet vetëm mbi të vërtetën, llogaridhënien dhe respektin për viktimat.
"Shqipëria beson fort se pajtimi i vërtetë mund të ndërtohet vetëm mbi të vërtetën, llogaridhënien, respektin për viktimat dhe të mbijetuarit, dhe një angazhim të përbashkët për të siguruar që krimet e së shkuarës të mos përsëriten kurrë. Rajoni ynë ka një të ardhme për të ndërtuar së bashku. Ajo e ardhme duhet të jetë evropiane: e rrënjosur në paqe, pajtim, bashkëpunim, respekt reciprok dhe respekt të palëkundur për kujtimin e atyre që vuajtën nga tmerret e luftës."
Albania condemns the glorification of Ratko Mladić, a convicted war criminal who died while serving a life sentence for genocide, crimes against humanity and war crimes. We join the European Union, its leaders and all those who have rightly condemned the manner in which he was…
— Ferit Hoxha???????? (@HoxhaFer) September 8, 2026
Sondazh
Lexo gjithashtu
