Aktivisti Ilir Xhemalaj deklaroi se protesta qytetare kundër qeverisë ka hyrë në një fazë të re, atë të mosbindjes civile, ndërsa paralajmëroi përshkallëzim të aksioneve deri në përmbushjen e kërkesave të protestuesve.
I ftuar në emisionin “Off the Record” në A2 CNN, Xhemalaj tha se protestat para Kryeministrisë dhe Parlamentit do të vijojnë, duke bërë të ditur se sipas tij lëvizja qytetare nuk do të tërhiqet.
Ai komentoi edhe masat e marra nga Policia e Shtetit gjatë protestës së sotme, duke i cilësuar ato si të ekzagjeruara dhe të ngjashme me një “shtetrrethim”.
Xhemalaj tha se protestuesit do të qëndrojnë në Parlament deri në dorëheqjen e qeverisë së Edi Ramës, ndërsa kërkoi paralelisht edhe largimin e Sali Berishës nga drejtimi i Partisë Demokratike.
Sipas tij, objektivi i protestës nuk është vetëm ndryshimi i qeverisë, por edhe ndryshimi i sistemit politik.
“Ne do të vazhdojmë përshkallëzimin e mosbindjes civile deri në realizimin e qëllimeve tona. Kjo është e panegociueshme”, deklaroi Xhemalaj.
Ai tha gjithashtu se mosbindjen civile e kishte shpallur më 31 gusht, ndërsa zbatimi i saj nisi më 1 shtator.
