Një ortek i fuqishëm ka goditur një grup alpinistësh në Malet e Kaukazit, në Rusi, duke shkaktuar një bilanc tragjik me të paktën 11 viktima.
Ngjarja ka ndodhur pasditen e së dielës, më 6 shtator, në Grykën e Bezengit, në rajonin e Kabardino-Balkarias. Sipas autoriteteve, një masë e madhe dëbore është shkëputur nga mali Mizhirgi dhe ka përfshirë 33 persona që ndodheshin në zonë.
Përveç 11 personave që humbën jetën, gjashtë alpinistë kanë mbetur të plagosur dhe janë transportuar për trajtim mjekësor, ndërsa 10 të tjerë kanë mundur të largohen vetë nga zona e rrezikut.
Operacioni i kërkim-shpëtimit vijon për gjetjen e gjashtë personave që rezultojnë ende të zhdukur. Dhjetëra efektivë janë angazhuar në terren, por ndërhyrja po vështirësohet nga kushtet e motit, terreni i thyer dhe rreziku i ortekëve të tjerë.
Autoritetet kanë bërë të ditur se mund të përdoren edhe helikopterë në operacion, nëse kushtet atmosferike do ta bëjnë të mundur.
Në pamjet që janë publikuar në rrjetet sociale shihet momenti kur një masë e madhe dëbore zbret me shpejtësi përgjatë shpateve të malit, duke përfshirë zonën ku ndodheshin alpinistët.
Gryka e Bezengit, e vendosur në Kaukazin Qendror, njihet për majat e larta, akullnajat dhe terrenin e vështirë, ndërsa ekipet e shpëtimit vijojnë kërkimet për personat e zhdukur. Bilanci i kësaj tragjedie mbetet ende paraprak.
