Një zjarr i përmasave të mëdha ka përfshirë që në orët e para të ditës zonën e Bagos në Kavajë, ku disa vatra janë riaktivizuar në pika të ndryshme.
Forcat zjarrfikëse të Kavajës ndodhen në terren dhe po punojnë për izolimin e flakëve.
Situata është paraqitur shqetësuese pranë dy banesave, por ndërhyrja e zjarrfikësve ka shmangur deri tani rrezikun e drejtpërdrejtë për to. Zjarri vijon të jetë aktiv në disa zona, ndërsa puna për shuarjen vështirësohet nga sipërfaqja e madhe e përfshirë dhe terreni i thyer, i cili pengon futjen e mjeteve zjarrfikëse.
Për këtë arsye, është kërkuar ndërhyrja e një helikopteri për shuarjen e flakëve nga ajri.
