AfD kërkon deportimin e mbi 1 milion refugjatëve

Partia e djathtë gjermane Alternativa për Gjermaninë (AfD) ka kërkuar deportimin e më shumë se një milion refugjatëve, kërkesat e të cilëve për azil janë refuzuar.

Thirrja u bë nga bashkëkryetarja e partisë, Alice Weidel, gjatë një debati në parlamentin gjerman, vetëm pak ditë pas fitores së AfD-së në zgjedhjet rajonale në Saksoni-Anhalt.

Weidel deklaroi se rezultati zgjedhor ishte një mesazh i qartë i votuesve për një ndryshim të politikave të emigracionit dhe akuzoi qeverinë se po lejon hyrjen e qindra mijëra migrantëve përmes sistemit të azilit.

Sipas saj, personat të cilëve u është refuzuar azili duhet të largohen nga Gjermania. Ajo e lidhi gjithashtu emigracionin me rritjen e krimit, duke përmendur sulmet me thikë, veprat e dhunshme dhe seksuale dhe problemet në hapësirat publike.

AfD, e cila shënoi një rezultat rekord në zgjedhjet rajonale të së dielës, po e përdor fitoren për të shtuar presionin ndaj qeverisë gjermane për një politikë më të ashpër ndaj emigracionit.