Plagosja e dyfishtë në Laprakë, identifikohet autori. Zbardhen rrethanat e ngjarjes

Policia e Tiranës ka dalë me një njoftim lidhur me plagosjen e dyfishtë të regjistruar mbrëmjen e së martës në Laprakë. Policia bën me dije se autori i ngjarjes është identifikuar teksa po punohet për kapjen e tij.

Në njoftim bëhet me dije se janë zbardhur edhe rrethanat e ngjarjes. Sipas policisë, autori 36-vjeçar dyshohet se ka qëlluar me armë zjarri në drejtim të 2 të plagosurve, për motive të dobëta, dhe është larguar me automjet. Të dëmtuarit fatmirësisht janë jashtë rrezikut për jetën.

“Tiranë/Zbardhen brenda 24 orëve, autorësia dhe rrethanat e plagosjes së dyfishtë me armë zjarri, kryer mbrëmë, në Laprakë. Identifikohet autori i dyshuar dhe punohet intensivisht për kapjen e tij.

Si rezultat i veprimeve të shpejta dhe profesionale hetimore kryer nga specialistët e sektorit për Hetimin e Krimeve të Rënda, në bashkëpunim me shërbimet e Komisariatit të Policisë Nr. 3, me qëllim zbardhjen e autorësisë dhe rrethanave të plagosjes me armë zjarri, të shtetasve D. T. dhe B. D. (miq me njëri-tjetrin), rreth orës 21:20 të datës 08.09.2026, në Laprakë, u mundësua identifikimi i autorit të dyshuar të rastit, shtetasit A. K., 36 vjeç, banues në Tiranë.

36-vjeçari dyshohet se ka qëlluar me armë zjarri në drejtim të 2 shtetasve, për motive të dobëta, dhe është larguar me automjet. Të dëmtuarit janë jashtë rrezikut për jetën.

Punohet intensivisht për lokalizimin dhe kapjen e shtetasit A. K. Materialet procedurale iu referuan Prokurorisë për veprime të metejshme”, njofton policia.