Këshilli i Lartë i Prokurorisë arriti të mërkurën të krijonte kuorumin e nevojshëm për të vijuar seancën që ka si objekt shqyrtimin e kërkesës së kandidatit për Prokuror të Përgjithshëm, Ylli Pjetërnika për përjashtimin e anëtarit Vatë Staka nga procedura e përzgjedhjes së aplikantëve, me pretendimin se ai gjendet në kushtet e konfliktit të interesit, si dhe të një serie kërkesash të disa anëtarëve për përjashtimin e njëri-tjetrit. Anëtari Erion Fejzulla, i larguar të enjten me argumentin se nuk donte të bëhej pjesë e një vendimarrjeje të paligjshme, deklaroi të mërkurën se ishte paraqitur me qëllim që të mundësohet kuorumi e të vijohet me procesin.
Megjithatë, gjatë mbledhjes që zgjati rreth tre orë, u arrit të merret vendim vetëm për një nga katër kërkesat për përjashtim të anëtarëve. Më konkretisht, u votua me 4 vota pro dhe tre kundër, që kryetarja Mirela Bogdani të mos marrë pjesë në shqyrtimin e kërkesës së anëtarit Zeqir Hoda për përjashtimin e kolegut Sokol Stojani në shqyrtimin e kërkesës së Pjetërnikajt për përjashtimin e Sakës.
Seanca për vijimin e shqyrtimit të kërkesave të tjera për përjashtim u shty përsëri për të enjten në orën 10:00.
Anëtarët e KLP-së gjatë të katër mbledhjeve të dështuara për mungesën e kuorumit, e kanë vendosur theksin në rëndësinë e procesit për përzgjedhjen e Prokurorit të Përgjithshëm të ri. Nga ana tjetër, një kërkesë e kandidatit Ylli Pjetërnika për përjashtimin e Stakës futi në ngërç të gjithë procesin.
Staka nga ana e tij kërkoi përjashtimin e anëtarit Zeqir Hoda, ky i fundit përjashtimin e anëtarit Sokol Stojani dhe Stojani përjashtimin e kryetares së KLP, Mirela Bogdani.
Të mërkurën, Hoda lexoi kërkesën e tij për përjashtimin e Stojanit nga shqyrtimi kërkesës së Stakës, si dhe një kërkim të dytë, për përjashtimin po të Stojanit nga shqyrtimi i kërkesës së kandidatit Pjetërnikaj. Sipas Hodës, anëtari Sokol Stojani, ka dhënë qëndrimin e tij lidhur me verifikimin e Stakës në vitin 2019 kur ushtronte funksionin në Prokurorinë e Përgjithshme dhe se ky fakt e vendos në kushtet e konfliktit të interesit për të shqyrtuar kërkesën e Pjetërnikajt.
Stojani deklaroi se nuk e kuptonte kërkesën e fundit për përjashtim, pasi kishte qenë në pozicionin e drejtorit në Prokurorinë e Përgjithshme në atë kohë dhe i ishte lënë detyra të trajtonte si rast. Pas dorëzimit të kësaj kërkese të anëtarit Zeqir Hoda, nga disa anëtarë u kërkua kohë që ta shqyrtonin, duke pasjellë shtyrjen e mbledhjes plenare.
Për pozicionin e Prokurorit të Përgjithshëm, me një mandat 7-vjeçar janë në garë prokurori i SPAK, Adnan Xholi; ish-Prokurorja e Përgjithshme e Përkohshme, Arta Marku e cila aktualisht e ushtron funksionin pranë Prokurorit së Apelit Tiranë; prokurorja pranë Eurojust, Fatjona Memçaj; prokurorja e Tiranës, Rovena Zoto; si dhe prokurori i Tiranës, Ylli Pjetërnikaj, i cili aktualisht është pedagog i brendshëm pranë Shkollës së Magjistraturës.
