Farsa e tenderit 50 milionë për mirëmbajtjen e rrugëve kryesore të vendit në katër vitet e ardhshme ka filluar të prodhojë efektet e para. Autoriteti Rrugor shpalli fituesin e parë ndër katër lotet e kontratës.
Bëhet fjalë për kontratën A, e cila parashikon mirëmbajtjen e rrugëve kombëtare në rajonin e Veriut. Fituesi i kësaj kontrate është shpallur kompania Geci shpk, e cila ishte kompania e vetme e kualifikuar në garë.
Fondi limit i përcaktuar për kontratën A të mirëmbajtjes ishte 814.3 milionë lekë ose 8.8 milionë euro. Kompania Geci, e cila ishte e vetmja e kualifikuar nga ARRSH për të dhënë ofertë financiare, ka ofruar çmimin 803.8 milionë lekë ose sa gati 99 për qind e fondit limit.
Në tre lotet e tjerë pritet të ndodhë e njëjta situatë, pasi edhe në këto lote ARRSH ka kualifikuar vetëm nga një kompani për të dhënë ofertë financiare.
Praktikisht ky është një mekanizëm, i cili do të shpërndajë 50 milionë euro pa garë dhe qytetarët shqiptarë do të paguajnë mungesën e konkurrencës përmes çmimeve të larta, të cilat me gjasa do të jenë të gjitha në nivelin e fondit limit, pasi kompanitë e kualifikuara për secilin lot nuk kanë asnjë shqetësim konkurrence ngaqë janë të vetme.
Tenderi për mirëmbajtjen e rrugëve kryesore të vendit ishte me dy faza. Në fazën e parë, kompanitë dorëzuan vetëm dokumentacionin për të provuar përmbushjen e kushteve të kërkuara.
Por ARRSH i skualifikoi të gjitha kompanitë pjesëmarrëse në fazën e parë, duke lënë vetëm nga një kompani për secilin nga lotet, të cilat tashmë ofrojnë të pashqetësuara në kokë të fondit limit.
Paralelisht për këtë tender tashmë ka një hetim në SPAK, pasi dyshohet se në njërin nga lotet ARRSH ka kualifikuar një kompani me letra të falsifikuara./ kapitali.al
