Tenderi 50 mln euro për mirëmbajtjen/ Akset e Veriut “kapin” 99% të fondit limit

Në tre lotet e tjerë pritet të ndodhë e njëjta situatë, pasi edhe në këto lote ARRSH ka kualifikuar vetëm nga një kompani për të dhënë ofertë financiare.

Praktikisht ky është një mekanizëm, i cili do të shpërndajë 50 milionë euro pa garë dhe qytetarët shqiptarë do të paguajnë mungesën e konkurrencës përmes çmimeve të larta, të cilat me gjasa do të jenë të gjitha në nivelin e fondit limit, pasi kompanitë e kualifikuara për secilin lot nuk kanë asnjë shqetësim konkurrence ngaqë janë të vetme.

Tenderi për mirëmbajtjen e rrugëve kryesore të vendit ishte me dy faza. Në fazën e parë, kompanitë dorëzuan vetëm dokumentacionin për të provuar përmbushjen e kushteve të kërkuara.

Por ARRSH i skualifikoi të gjitha kompanitë pjesëmarrëse në fazën e parë, duke lënë vetëm nga një kompani për secilin nga lotet, të cilat tashmë ofrojnë të pashqetësuara në kokë të fondit limit.

Paralelisht për këtë tender tashmë ka një hetim në SPAK, pasi dyshohet se në njërin nga lotet ARRSH ka kualifikuar një kompani me letra të falsifikuara./ kapitali.al