Një 35-vjeçar shqiptar është vrarë në Itali dhe trupi i tij është gjetur brenda një automjeti të fundosur n&...
BOTA
Debati për emigracionin/ Kryetarja e AfD kërkon dëbimin e mbi 1 milionë emigrantëve! Merz: Doni të bëni spastrim etnik
PiranjatPërditësimi i fundit 9 Shtator 2026, 19:10
Përplasja për emigracionin ka dominuar debatin në Bundestag, pasi bashkëkryetarja e partisë së djathtë radikale AfD, Alice Weidel, kërkoi dëbimin e më shumë se 1 milion refugjatëve, të cilëve u është refuzuar kërkesa për azil në Gjermani. Sipas saj, rezultati i zgjedhjeve në landin e Saksoni-Anhalt tregon se votuesit mbështesin një kurs shumë më të ashpër ndaj emigracionit.
"Ju deklaroni se kriza e emigracionit ka përfunduar. Megjithatë, çdo vit qindra mijëra emigrantë hyjnë në vend përmes sistemit të azilit. Në Gjermani jetojnë më shumë se një milion refugjatë, kërkesat për azil të të cilëve janë refuzuar disa herë. Çfarë bëjnë ende në këtë vend? Ata duhet të dëbohen", deklaroi Weidel në parlament.
Kancelari Friedrich Merz e kundërshtoi ashpër këtë qëndrim, duke theksuar se largimi i emigrantëve që punojnë do të kishte pasoja të rënda për ekonominë gjermane.
"Nëse emigrantët që punojnë në Gjermani duhet të largohen për shkak të planeve tuaja për 'riemigrim', atëherë sektori i zanateve nuk do të funksionojë më, shtëpitë e kujdesit nuk do të funksionojnë më, spitalet nuk do të funksionojnë më dhe as restorantet nuk do të mund të vazhdojnë punën", tha Merz.
Kancelari akuzoi AfD-në se po nxit frikë dhe po përçan shoqërinë, ndërsa planin e saj e cilësoi "asgjë tjetër veçse spastrim etnik sipas ngjyrës së lëkurës dhe origjinës". Ai bëri dallimin mes emigrantëve që punojnë dhe kontribuojnë në ekonominë gjermane dhe personave që nuk kanë të drejtë qëndrimi, duke theksuar se këta të fundit duhet të kthehen në përputhje me ligjin dhe detyrimet për të drejtat e njeriut.
Gjatë debatit, Weidel pretendoi gjithashtu se emigracioni masiv ka rritur kriminalitetin dhe pasigurinë në Gjermani, duke përmendur sulmet me thikë, krimet seksuale dhe ato të dhunshme, si edhe deklaroi se rreth tre të katërtat e përfituesve të ndihmës bazë për të papunët janë të huaj ose me prejardhje emigrante.
Debati u zhvillua vetëm pak ditë pasi AfD siguroi një fitore të frikshme në zgjedhjet e landit të Saksoni-Anhalt, ku emigracioni ishte tema kryesore e fushatës së partisë.
