Nojer gati të vendosë një rekord në Champions League
Manuel Nojer është gati të shkruajë një tjetër faqe të rëndësishme në historinë e Ligës së Kampionëve. Portieri i Bajern Mynih pritet të jetë në fushë këtë të enjte ndaj Bodo/Glimt, në një sfidë që do të ketë një rëndësi të veçantë për të.
Nëse zbret në fushë, Nojer do të regjistrojë ndeshjen e tij të 162-të në Ligën e Kampionëve, duke u ngjitur në vendin e tretë në listën e lojtarëve me më shumë paraqitje në historinë e kompeticionit. Me këtë shifër, ai do të barazojë Lionel Mesin dhe Tomas Mylerin.
Përpara tij qëndrojnë vetëm dy legjenda të futbollit botëror: Iker Kasijas me 177 ndeshje dhe Kristiano Ronaldo me 183.
Nojer, ndërkohë, e ka bërë të qartë se ambiciet e tij për këtë sezon janë të mëdha. Gjermani nuk e përjashton mundësinë që ky të jetë sezoni i fundit i karrierës së tij dhe dëshiron ta mbyllë atë në mënyrën më të mirë të mundshme.
“Po i afrohem këtij sezoni me vendosmërinë për të arritur të gjitha objektivat tona. E di se ky mund të jetë sezoni im i fundit dhe se gjithçka është e mundur. Nuk dua të flas shumë për titujt, pasi fokusi ynë është te çdo ndeshje dhe te fillimi i çdo gare. Megjithatë, një finale në Madrid dhe mundësia për të fituar një trofe të tretë të Ligës së Kampionëve do të nënkuptonte gjithçka për mua”, u shpreh Nojer.
