Deputetja demokrate Jorida Tabaku ka denoncuar atë që e cilëson si një mekanizëm të ri të sistemit të ngritur nga kryeministri Edi Rama për administrimin e tenderëve, pronave dhe aseteve publike në favor të një pakice të privilegjuar.
Në një video të publikuar në rrjetet sociale, Tabaku argumenton se emrat dhe sektorët ndryshojnë, por mënyra e funksionimit mbetet e njëjtë. Sipas saj, dje këtë rol e luante Ergys Agasi, ndërsa sot po shfaqet biznesmeni izraelit Ron Yeffet.
“Dje ishte Ergysi, sot është Roni dhe nesër do të jetë dikush tjetër”, shprehet Tabaku, duke theksuar se Shqipëria po trajtohet gjithnjë e më shumë si një “shtet privat”, ku vendimet për tenderët dhe pasuritë publike merren jashtë institucioneve.
Deputetja demokrate ngre shqetësimin se mekanizmi që, sipas saj, është përdorur fillimisht në sektorin e teknologjisë së informacionit dhe më pas në fushën e mbrojtjes, mund të shtrihet edhe në shëndetësi. Në këtë rast, paralajmëron ajo, pasojat nuk do të cenonin vetëm financat publike, por edhe sigurinë dhe jetën e qytetarëve.
Tabaku përmendi edhe rastin e familjes Dervishi, duke deklaruar se në sektorin e mbrojtjes po preken prona publike dhe private. Ajo akuzoi qeverinë se ka zëvendësuar meritokracinë, konkurrencën dhe aftësitë sipërmarrëse me lidhjet personale dhe përfaqësimin e interesave të pushtetit.
Sipas Tabakut, problemi nuk qëndron te një individ apo te një episod i izoluar, por te një sistem i tërë që kontrollon sektorët strategjikë të ekonomisë.
“Ky është sistemi që ka kapur prej fyti shqiptarët”, deklaron ajo.
Deputetja e PD-së e lidh këtë mënyrë qeverisjeje me vështirësitë ekonomike të familjeve shqiptare, rritjen e kostos së jetesës dhe pengesat në procesin e integrimit europian. Sipas saj, një ekonomi e ndërtuar mbi privilegjet dhe vendimet e marra në zyrat e biznesmenëve dëmton konkurrencën, cenon sigurinë kombëtare dhe dobëson institucionet.
Tabaku përfundon se fenomenet e denoncuara nuk mund të trajtohen si raste të shkëputura. Në vlerësimin e saj, ndryshimi kërkon çmontimin e sistemit politik që i prodhon dhe i mbron këta mekanizma.
Deklarata e plotë:
Sistemi i Edi Ramës është i tillë që nuk ka rëndësi sektori dhe as emri, pasi dje ishte Ergysi, sot është Roni dhe nesër do të jetë dikush tjetër. Rëndësi ka fakti se sot gjithçka është kthyer në një shtet privat.
Kjo ka ndodhur në sektorin e teknologjisë së informacionit, nëpërmjet AKSHI-t; po ndodh në sektorin e mbrojtjes dhe nesër mund të ndodhë në shëndetësi, duke rrezikuar edhe jetën e shqiptarëve.
Secili prej këtyre sektorëve ka një koordinator që ndan asetet publike, merr tenderët dhe, në rastin e mbrojtjes, merr prona publike dhe private, si në rastin e familjes Dervishi. Nesër ata mund të marrin në dorë edhe jetën e shqiptarëve.
Sistemi i Ramës nuk njeh meritokracinë, aftësitë sipërmarrëse apo CV-në. Ky sistem promovon vetëm njohjet dhe lidhjet, ndërsa të krijon mundësi vetëm nëse përfaqëson interesat e Ramës.
Ky është sistemi që duhet të ndryshojmë, sepse i ka kapur prej fyti shqiptarët. Prandaj tenderët e AKSHI-t i vendoste Ergysi nga zyra e tij, tenderët e ministrisë i vendos Roni nga zyra e tij, ndërsa tenderët e shëndetësisë nesër do t’i vendosë dikush tjetër nga zyra e vet, duke cenuar kështu edhe sigurinë kombëtare.
Kjo është arsyeja përse vuajnë shqiptarët: kemi një ekonomi të një pakice të privilegjuar, rregullat e së cilës shkruhen në zyrat e biznesmenëve. Shteti i kapur është kthyer në pengesë për procesin e integrimit europian.
Gjithçka që po shohim nuk lidhet me një rast episodik. Është një sistem që ka kapur Shqipërinë dhe që mund të rrëzohet vetëm duke rrëzuar kokën e këtij sistemi.
