Një video e publikuar nga avokati Arben Llangozi në Facebook rikthen në vëmendje një ngjarje të ndodhur në Gomsinë e Re, në Velipojë, ku në një lokal shfaqen armë zjarri, mes tyre një kallashnikov AK-47 dhe një pistoletë.
Përtej pamjeve, Llangozi ngre një pikëpyetje edhe më të fortë: çfarë ka ndodhur me punonjësit e Policisë që, sipas tij, përmenden në materialet e çështjes?
Sipas avokatit, në aktet e administruara rezultojnë inicialet K. N., V. P., E. G., F. G. dhe G., ndërsa në dosje ndodhen edhe pamjet e kamerave të sigurisë dhe deklarimet e personave të përfshirë.
Llangozi pretendon se provat janë administruar, por pavarësisht kësaj, ndaj punonjësve të Policisë të përmendur në ngjarje nuk është marrë asnjë masë. Avokati ngre pikëpyetje mbi heshtjen e AMP-së.
“Kur në një dosje ke AK-47, pistoletë, pamje filmike dhe punonjës policie të përmendur, nuk mund të mjaftohesh vetëm duke futur provat në fashikull”, shprehet Llangozi.
Reagimi i plote i avokatit
Një ngjarje e rëndë e ndodhur në Gomsinë e Re, Velipojë, ku sipas akteve të çështjes janë shfaqur një kallashnikov AK-47 dhe një pistoletë, ngre pikëpyetje serioze për mënyrën se si janë trajtuar punonjësit e policisë që përmenden në këtë histori.
Në materialet e administruara dalin inicialet K. N., V. P., E. G., F. G. dhe G., ndërsa sipas informacioneve që disponojmë në ngjarje përfshihen edhe punonjës policie. Pamjet e kamerave të sigurisë janë marrë dhe administruar, deklarimet janë dokumentuar dhe dinamika e ngjarjes mund të verifikohet nga provat që ndodhen në dosje.
Por problemi është pikërisht këtu, provat janë administruar, ndërsa sipas të dhënave tona ndaj punonjësve të policisë të përfshirë nuk është marrë asnjë masë. AMP ka pasur mundësinë të verifikojë pamjet, deklarimet dhe rolin e secilit efektiv, por deri tani nuk rezulton një reagim që t’i përgjigjet seriozitetit të ngjarjes.
Kur në një dosje ke AK-47, pistoletë, pamje filmike dhe punonjës policie të përmendur, nuk mund të mjaftohesh vetëm duke futur provat në fashikull. Pyetja për AMP-në është e drejtpërdrejtë: provat u administruan, po masat ku janë?
