Skena e festivalit në Gjirokastër fiton çmim në konkursin ndërkombëtar

Vepra “Loom” në Gjirokastër është shpallur fituese e CODAawards 2026 në kategorinë “Art for Festivals + Events”, një nga kategoritë e konkursit ndërkombëtar që vlerëson ndërthurjen e artit me dizajnin dhe hapësirat publike.

Projekti është paraqitur në konkurs nga Ines Esnal. CODAworx e përshkruan “Loom” si një strukturë skenike të ngjashme me një tezgjah në Shqipëri dhe e rendit mes projekteve që tregojnë se hapësirat publike më të paharrueshme krijohen nga bashkëpunimi mes artistëve dhe porositësve të veprave.

Në edicionin e këtij viti u paraqitën 302 projekte nga 19 vende, me një vlerë të përgjithshme prej më shumë se 123 milionë dollarësh në porosi artistike. Fituesit u përzgjodhën nga një juri me profesionistë të artit, arkitekturës dhe dizajnit në 12 kategori të ndryshme.

Fituesit e CODAawards 2026 do të nderohen gjatë CODAsummit Santa Fe, që zhvillohet nga 29 shtatori deri më 1 tetor, ndërsa ceremonia kryesore e çmimeve është parashikuar për 30 shtator.

CODAworx është një platformë ndërkombëtare e fokusuar te arti publik dhe bashkëpunimi mes artit, dizajnit dhe arkitekturës. Ajo u ofron profesionistëve një platformë për të prezantuar projektet, për t’u lidhur dhe për të gjetur mundësi bashkëpunimi. CODAawards janë çmimet që organizon CODAworx. Ato u krijuan në vitin 2012 nga Toni Sikes dhe Ilene Shaw për të vlerësuar fuqinë transformuese të artit të integruar në mjediset e ndërtuara.

1 / 8