Rreth 100 kilogramë kokainë janë sekuestruar nga autoritetet greke në aeroportin ndërkombëtar “Eleftherios Venizelos” në Athinë.
Sipas mediave greke, lënda narkotike ishte fshehur në një ngarkesë me trëndafila të ardhur nga Kolumbia.
Në kuadër të operacionit janë arrestuar gjashtë persona, shumica prej tyre shtetas shqiptarë. Katër prej të arrestuarve u vunë në pranga në ambientet e aeroportit, ku dyshohet se kishin shkuar për të marrë ngarkesën me drogë.
Dy personat e tjerë u arrestuan në zonën e Maratonës, ku sipas dyshimeve të autoriteteve, kokaina do të transportohej dhe më pas do të ruhej.
Në operacionin dhe hetimet për zbardhjen e rastit kanë asistuar edhe oficerë të Drejtorisë Kundër Krimit të Organizuar.
Autoritetet greke vijojnë hetimet për të zbardhur të gjithë strukturën e rrjetit të dyshuar të trafikut të drogës, si dhe për të përcaktuar rolin e secilit prej personave të arrestuar.
