Ka nisur me tensione protesta e paralajmëruar prej dy ditësh nga banorët e zonës naftëmbajtëse Patos-Marinëz.
Protestuesit kanë hapur me forcë portën e një prej sektorëve të kompanisë Bankers Petroleum dhe janë futur në ambientet e saj.
Banorët kanë kërkuar largimin e punonjësve nga zona, ndërsa situata është tensionuar.
Protesta zhvillohet në vijim të kërkesave të banorëve për respektimin e kontratave dhe pagesat për tokat e dhëna me qira kompanisë.
“Është prona ime, jo e jotja. Kemi bërë një kontratë bashkë, por nuk po e zbaton, nuk po më jep lekët”, shprehet një nga banorët.
Protesta e banorëve në zonën naftëmbajtëse Patos-Marinzë lidhet me një konflikt të përsëritur me kompaninë Bankers Petroleum për pagesat dhe kushtet e kontratave të qirasë së tokave.
Banorët e Marinzës, Belinës, Sheqishtës, Zharrëzës, Kallmit, Frashërit dhe Kumanit pretendojnë se prej fillimit të vitit 2026 nuk kanë marrë pagesat për tokat që kompania përdor për aktivitetin e saj, përfshirë rrugë, parkingje, sheshe pune dhe puse nafte. Sipas tyre, rreth 800 banorë preken nga kjo situatë.
Një tjetër pikë e debatit është ndryshimi i kushteve të kontratave dhe ulja e vlerës së qirasë. Banorët kundërshtojnë kalimin nga pagesa vjetore në dyvjeçare dhe pretendojnë se vlera e qirasë është propozuar të përgjysmohet, nga rreth 400 në 200 lekë për metër katror. Ata kërkojnë që të zbatohen kontratat ekzistuese dhe të shlyhen detyrimet e prapambetura.
Protestat kanë vijuar prej muajsh dhe situata është tensionuar në disa raste. Në gusht, protestuesit u përplasën me rojet e sigurisë së kompanisë, ndërsa në protestën e fundit, më 8 shtator, banorët paralajmëruan se, nëse nuk gjendet një zgjidhje, do ta përshkallëzojnë protestën deri në bllokimin e aktivitetit në disa prej puseve të naftës.
