Alarmi për klimën! Gushti 2026 regjistrohet si muaji më i nxehtë në histori, “El Niño” pritet të rrisë më tej tempe

Gushti 2026 ka qenë bashkërisht muaji më i nxehtë i regjistruar ndonjëherë në botë, duke barazuar rekordin e korrikut 2023, sipas shërbimit klimatik të Bashkimit Evropian, Copernicus.

Temperatura mesatare globale gjatë gushtit ishte rreth 1.65°C mbi nivelet para-industriale, duke kaluar pragun kritik prej 1.5°C, të cilin vendet e botës kanë synuar ta shmangin për të kufizuar pasojat më të rënda të ndryshimeve klimatike.

Një muaj i vetëm mbi këtë nivel nuk do të thotë se kufiri është kaluar në mënyrë të pakthyeshme, por tregon një prirje shqetësuese.

Rekordi është ndikuar nga ndryshimet klimatike, por edhe nga forcimi i fenomenit natyror El Niño, i cili ngroh ujërat e Paqësorit dhe çliron sasi të mëdha nxehtësie në atmosferë. Sipas ekspertëve të Copernicus, El Niño aktual po forcohet dhe mund të jetë ndër më të fuqishmit e regjistruar ndonjëherë, ndërsa ndikimi i tij më i madh në temperaturat globale pritet gjatë vitit të ardhshëm.

Gushti mbylli gjithashtu verën më të nxehtë të regjistruar ndonjëherë në Evropën Perëndimore. Në Mbretërinë e Bashkuar, vera e vitit 2026 ishte më e nxehta që prej fillimit të regjistrimeve në vitin 1884. Sipas ekspertëve, ndryshimet klimatike të shkaktuara nga aktiviteti njerëzor e kanë bërë një verë të tillë shumë më të mundshme.

Vala e të nxehtit në Evropë shkaktoi probleme të shumta, duke prekur shkollat, sistemin shëndetësor dhe prodhimin bujqësor, ndërsa nxiti zjarre dhe thatësira dhe kontribuoi në dhjetëra mijëra viktima.

Ekspertët paralajmërojnë se temperaturat rekord nuk duhet të konsiderohen si “normalja e re”. Sipas tyre, për sa kohë vazhdon djegia e lëndëve fosile, rekordet e temperaturave do të vazhdojnë të thyhen dhe fenomenet ekstreme do të bëhen gjithnjë e më të rënda.

“Provat janë të pakundërshtueshme”, deklaroi kreu i OKB-së për klimën, Simon Stiell, duke e lidhur rritjen e temperaturave me përdorimin e lëndëve fosile dhe krizën globale të klimës.