Teksa mesditën e sotme do të zhvillohet mbledhja urgjente e gjyqtarëve të Shqipërisë në fokus të të cilës do të jetë ngërçi i pagave të magjistratëve, gjykatat e qyteteve kanë bojkotuar punën e tyre. Pas bojkotit të djeshëm të Gjykatës së Lushnjës, sot raportohet se kanë pezulluar punimet e tyre dhe gjyqtarët e Durrësit dhe Beratit si dhe gjykatësit e Apelit Administrativ të Tiranës.
Pavarësisht vendimit për të bojkotuar punën në shenjë proteste për mosmarrjen e pagave të tyre, gjyqtarët e Durrësit dhe Beratit janë shprehur të gatshëm për t’i shërbyer qytetarëve për çështjet urgjente. Në Durrës bëhet me dije se puna është ndërprerë pjesërisht në seksionin civil.
“Theksojmë se veprimtaria e Gjykatës së Shkallës së Parë të Juridiksionit të Përgjithshëm Durrës nuk është cënuar në thelb pasi sot të gjithë Gjyqtarët e Republikës së Shqipërisë janë në mbledhje të përgjithshme të gjyqtarëve për situatën e pagave” janë shprehur në një deklaratë të dhënë për mediat gjyqtarët e Durrësit.
Ndërkohë, bëhet me dije se mbledhja e sotme e gjyqtarëve do të zhvillohet me dyer të mbyllura, duke përjashtuar këtu momentin e fjalimit të Kryetarit të Gjykatës së Lartë, për të cilin gazetarja Anila Hoxha bën me dije se do të transmetohet live për mediat.
Më tej, diskutimet për çështjen e bujshme të bllokimit të pagave raportohet se do të zhvillohen pa praninë e mediave. Fjala përfundimtare do t’u dorëzohet gazetarëve në vijim.
Sondazh
Lexo gjithashtu
