Hetuesit ende nuk kanë “vendosur pikat mbi i” në lidhje me shkakun e shpërthimit të fuqishëm në pikën e karburantit “Edia” në zonën e Brrylit në Tiranë.
Ndërkohë tre punonjësit të cilët mbetën të lënduar janë marrë në pyetje dhe gjithçka kanë deklaruar ka qenë se në momentin e shpërthimit ishin duke furnizuar me gaz një automjet, por nuk dinë të thonë se si ose nga nisi shpërthimi. Ata kanë dëshmuar se pranë zyrave ndodhej edhe një bombolë gazi, e cila po verifikohet nga grupi hetimor, në rast se ka qenë ajo shkaku i shpërthimit.
Hetuesit janë duke punuar për të përcaktuar nëse shpërthimi lidhet me automjetin që po furnizohej, me ndonjë defekt në pompën e gazit apo me një rrjedhje nga bombola. Kujtojmë se të plagosurit 22-vjeçari Vlerim Hakballa, 30-vjeçari Rozart Abazi si dhe shtetasi Aurel Xhanaj ndodhen në spitalin e Traumës jashtë rrezikut për jetën.
Ndërkohë deklaratat paraprake të autoriteteve kanë qenë të ndryshme. Policia ka dhënë versionin paraprak të ngjarjes, duke deklaruar se dyshohet për shpërthimin e një bombule gazi gjatë kohës që një automjet po furnizohej me karburant. Ndërkohë, drejtori i Shërbimit Zjarrfikës Tiranë, Shkëlqim Goxhaj, ka dhënë një tjetër panoramë mbi vendin e ngjarjes, duke thënë se shpërthimi ka ndodhur në zyrat e karburantit dhe se nuk përjashtohet as mundësia që një automjet të ketë goditur objektin. Ndërsa vetë Inspektoriati Shtetëror Teknik dhe Industrial ka raportuar paraprakisht se nga hetimet e para rezulton se nuk ka pasur shpërthim të rezervuarëve të karburanteve. Sipas ISHTI deri më tani dyshohet se zjarri ka nisur nga një makinë brenda karburantit.
Sondazh
Lexo gjithashtu
