Dy persona janë arrestuar në Gjirokastër, pasi dyshohet se transportonin me autobusë sasi produktesh shtazore, mish dhe peshk, të kontrabanduara nga Greqia dhe të papajisura me dokumentacion tatimor.
Në kuadër të operacionit u arrestuan shtetasit A. B., 54 vjeç, banues në Gjirokastër, dhe K. M., 46 vjeç, banues në Tiranë.
Sipas Policisë, gjatë kontrolleve me skaner, në vijën e dytë të kontrollit në hyrje të Republikës së Shqipërisë, në dy autobusë pasagjerësh të linjave “Athinë-Gjirokastër” dhe “Athinë-Shkodër”, që drejtonin dy të arrestuarit, u konstatuan 31 pako me produkte shtazore, kryesisht mish dhe peshk.
Nga verifikimet paraprake dyshohet se produktet po transportoheshin në kundërshtim me kriteret higjieno-sanitare dhe ishin kontrabanduar nga Greqia, pasi nuk ishin të pajisura me dokumentacionin përkatës tatimor.
