Kryebashkiaku socialist i Patosit, Fation Duro këmbëngul se institucioni që ai drejton të mos shkrihet me Bashkinë Fier.
Gjatë konsultimit publik të mbajtur me qytetarët për reformën territoriale, kryebashkiaku socialist argumentoi se indeksi i funksionalitetit të Bashkisë Patos është më i lartë se ai i Bashkisë Fier, gjë që sipas tij, ngre pikëpyetje për shërbimet që do të marrin qytetarët nëse propozimi i mazhorancës miratohet nga Kuvendi.
“Për indeksionin e funksionalitet bashkia renditet e para në qark. Si mund të argumentohet shkrirja e një bashkie me indeks 71.7 me një bashki me indeks 55.4, pa provuar konkretisht se bashkimi do të përmirwsojë dhe jo dobësojë funksionin aktual të bashkisë”,- është shprehur Duro ndër të tjera.
Këshilltarët thonë po ashtu, se drejtuesja politike e qarkut Fier, Belinda Balluku i ka prerë në besë, pasi pak kohë më parë iu premtoi se Bashkia Patos nuk do të zhbëhet, duke kërkuar prej saj të ngrejë kartonin kundër në Kuvend.
Procesi i konsultimit publik do të vijojë edhe në njësitë administrative që përbëjnë Bashkinë Patos.
