Te fundit
iPhone për herë të parë paloset/ Apple nxjerr telefonin më të shtrenjtë në histori, çmimi arrin deri në 3,200 dollarë
10 Shtator 2026, 14:07Hi-Tech
TEMA
Apple ka prezantuar iPhone-in e saj të parë të palosshëm, një produkt që shënon ndryshimin më të madh në dizajnin e telefonit të kompanisë në gati dy dekada.
Modeli i ri, i quajtur iPhone Duo, nis në SHBA me një çmim prej 1,999 dollarësh, ndërsa versionet më të avancuara mund të kushtojnë deri në 3,200 dollarë. Në Mbretërinë e Bashkuar, çmimi fillestar është rreth 1,999 paund.
Ky është iPhone-i më i shtrenjtë i prodhuar ndonjëherë nga Apple dhe përbën një bast të madh për drejtuesin e ri të kompanisë, John Ternus, i cili mori drejtimin e Apple këtë muaj pas largimit të Tim Cook.
Telefoni është zhvilluar për rreth tetë vjet dhe Ternus ka qenë i përfshirë drejtpërdrejt në projekt gjatë viteve të tij në drejtimin e divizionit të pajisjeve të Apple.
Kur hapet, iPhone Duo ngjan me një iPad të vogël, ndërsa kur mbyllet ka përmasat e një telefoni më të gjerë. Apple thotë se pajisja është projektuar për t’u përdorur edhe me një dorë dhe ka një madhësi të përafërt me atë të një pasaporte.
Gjatë prezantimit në Kaliforni, Ternus e cilësoi pajisjen si një produkt që sjell një mënyrë krejtësisht të re përdorimi, duke kritikuar në mënyrë indirekte modelet ekzistuese të palosshme.
Por Apple hyn në këtë treg disa vite pas rivalëve si Samsung dhe Huawei, të cilët kanë tashmë një prani të konsoliduar në segmentin e telefonave të palosshëm.
Sipas analistëve, sfida më e madhe për Apple do të jetë pikërisht tregu kinez, ku Huawei ka një pozicion shumë të fortë në këtë kategori.
Një tjetër pikëpyetje është çmimi. Analistët paralajmërojnë se iPhone-i i palosshëm mund të përfundojë si një produkt luksoz që blihet më shumë për status sesa për përdorim masiv.
Çmimi është veçanërisht i lartë nëse krahasohet me iPhone-ët tradicionalë. Deri tani, çmimi fillestar i modelit më të shtrenjtë të iPhone ishte rreth 900 paund.
Një nga analistët e përshkroi iPhone-in e palosshëm si një bast që mund të rezultojë në një sukses të madh për Apple, por gjithashtu mund të ketë një fat të ngjashëm me Vision Pro, kufjet e realitetit të përzier të kompanisë, të cilat kushtojnë mijëra dollarë dhe nuk arritën shitjet e pritshme.
Tregu i telefonave të palosshëm është ende relativisht i vogël. Aktualisht, pajisjet e tilla përbëjnë rreth 2% të shitjeve globale të smartfonëve dhe parashikimet sugjerojnë se mund të arrijnë rreth 4% gjatë dekadës së ardhshme.
Megjithatë, hyrja e Apple në këtë kategori pritet të rrisë ndjeshëm interesin e konsumatorëve.
Krahas iPhone Duo, Apple prezantoi edhe iPhone 18 Pro dhe iPhone 18 Pro Max, me çmime fillestare përkatësisht 1,199 dhe 1,299 dollarë në SHBA.
Kompania prezantoi gjithashtu detaje të reja për Siri AI, versionin e përditësuar të asistentit të saj virtual. Duke nisur me iPhone 18, Siri do të jetë në gjendje të kërkojë informacion në aplikacionet dhe të dhënat e përdoruesit, përfshirë mesazhet dhe emailet, dhe të kryejë veprime në emër të tij.
Apple theksoi se një pjesë e këtyre funksioneve të inteligjencës artificiale do të përpunohen drejtpërdrejt në pajisje, ndërsa kompania premtoi se të dhënat personale do të mbeten private.
Prezenca e fortë e John Ternus në prezantimin e produktit të ri ka tërhequr gjithashtu vëmendjen e analistëve. Sipas tyre, fakti që ai mori drejtimin e Apple pikërisht në momentin e një prej lançimeve më të rëndësishme të kompanisë në vite nuk është rastësi.
Nëse iPhone Duo do të shndërrohet në revolucionin e ardhshëm të Apple apo do të mbetet një produkt luksoz për një grup të kufizuar konsumatorësh, do të përcaktohet nga reagimi i tregut në muajt e ardhshëm.
Burimi: BBC
Më të lexuarat
24 oret e fundit
Javen e fundit
Blog Tema
Lini një Përgjigje