Presidenti rus Vladimir Putin dhe presidenti kinez Xi Jinping ranë dakord të zhvillojnë bisedime të hollësishme në kuadër të samitit të ardhshëm të Bashkëpunimit Ekonomik Azi-Paqësor (APEC) më vonë këtë vit, tha të enjten një ndihmës i Kremlinit.

Ndihmësi i presidentit rus, Yury Ushakov, u tha gazetarëve se të dy presidentët ranë dakord të zhvillonin takimin gjatë kontakteve të tyre në margjinat e samitit të Organizatës së Bashkëpunimit të Shangait (SCO) në kryeqytetin e Kirgistanit javën e kaluar.

Samiti i APEC-ut do të zhvillohet në qytetin kinez Shenzhen nga 18-19 nëntori.

Ushakov tha më parë këtë muaj se Putin mund të zhvillojë një takim trepalësh me Xi dhe Presidentin e SHBA-së, Donald Trump në samit.

Ushakov u tha gjithashtu gazetarëve për vizitën e Putinit në Indi, ku ai do të marrë pjesë në samitin e 18-të të BRICS, duke thënë se presidenti rus do të niset për në Nju Delhi të enjten vonë.

Duke shprehur se bisedimet e para të presidentit pas mbërritjes së tij të premten do të jenë me kryeministrin indian Narendra Modi, Ushakov tha se Putin do të zhvillojë disa takime në margjinat e samitit, duke përfshirë edhe me presidentin e Afrikës së Jugut Cyril Ramaphosa, si dhe me kryeministrin malajzian Anwar Ibrahim dhe kryeministrin etiopian Abiy Ahmed.

Ai tha se Putin do të marrë pjesë në Forumin e Biznesit të BRICS dhe mohoi se ka plane për një takim midis Putinit dhe Xi në periferi të samitit. Ushakov shprehu besimin e tij, megjithatë, se dy presidentët do të komunikojnë ballë për ballë prapa skenave.

Ushakov vazhdoi ta përkufizonte BRICS-in si një “markë shumë popullore” të lidhur me “multilateralizmin e vërtetë”, duke deklaruar se ai ka fituar peshë të konsiderueshme dhe qëndron si një nga qendrat kryesore të një bote shumëpolare dhe qeverisjes globale.

“Vendet e BRICS janë të përkushtuara për të ndjekur një kurs të pavarur dhe autonom dhe kërkojnë t’i adresojnë sfidat kolektivisht, të bazuara në të drejtën ndërkombëtare dhe parimet thelbësore të Kartës së OKB-së”, shtoi Ushakov./ AA.