Një emigrant shqiptar që jeton në Athinë është rikthyer në Shqipëri për t’iu bashkuar protestës së 103-të kundër qeverisë. Nga sheshi, ai deklaroi se nuk ka ndërmend të largohet nga protesta për sa kohë kryeministri Edi Rama vijon të jetë në pushtet.
Me tone të ashpra ndaj kreut të qeverisë, emigranti tha se protesta në Shqipëri është komentuar edhe jashtë vendit, duke sjellë si shembull bisedat që ka pasur me shqiptarë dhe qytetarë grekë në Athinë.
Sipas tij, vazhdimësia e protestës ka tërhequr vëmendje edhe në Greqi, ku, siç u shpreh, nuk ka parë një protestë me një kohëzgjatje të tillë.
Ai akuzoi Ramën për dëme ndaj vendit dhe u bëri thirrje qytetarëve që t’i bashkohen protestës. Në mënyrë të veçantë, emigranti iu drejtua banorëve të Tepelenës, zonë me të cilën tha se ka origjinë.
“Rama i ka bërë të gjitha të zezat këtij kombi. Populli i Tepelenës të bashkohet në këtë protestë”, deklaroi ai, duke e mbyllur mesazhin e tij me thirrjen për largimin e kryeministrit.
