Një i ri, i diplomuar për inxhinieri, por aktualisht pa punë, ka ngritur akuza të forta ndaj mënyrës se si funksionon administrata publike, gjatë protestës së zhvilluar kundër qeverisë.
Nga sheshi i protestës, ai deklaroi se punësimi në administratë është kthyer, sipas tij, në një proces ku vendet e punës blihen përmes pagesave të majme. Sipas tij, për një pozicion pune kërkohet deri në 7 milionë lekë.
“Kam mbaruar studimet për inxhinieri, për momentin jam i papunë, sepse të gjitha postet në administratë kërkojnë deri në 7 mln lekë për një vend pune”, tha i riu.
Ai vijoi me kritikat ndaj qeverisë, duke e akuzuar për korrupsion dhe për një sërë aferash, ndërsa veçoi edhe zëvendëskryeministren Belinda Balluku.
“Sa do të durojnë shqiptarët këtë mizerabël qeveri që nuk ka fund me aferat e tyre, bashkë me inceneratorët, me krimet e Belinda Ballukut, që nuk di sa prona ka në Shqipëri, nga jugu në veri?”, u shpreh ai.
Në fund të fjalës së tij, i riu bëri thirrje për përshkallëzimin e protestës, duke deklaruar se nuk pranon të pajtohet me atë që e cilësoi si një qeveri që “vjedh qytetarët shqiptarë”.
“Unë nuk dua të duroj këtë qeveri që vjedh qytetarët shqiptarë”, përfundoi ai.
